أصل الحكاية.. “شوبير” يكشف تفاصيل مكالمته مع رمضان صبحي بشأن رحيله عن الأهلي.. وتواطؤ نادر شوقي مع ادارة الخطيب – فيديو
كشف الإعلامي أحمد شوبير عن تفاصيل مكالمة مطولة جمعته برمضان صبحى المنتهي إعارته حديثًا للنادي الأهلي، بعد إعلانه الرحيل إلى صفوف نادى بيراميدز.
وقال “شوبير” : جمعتني مكالمة مطولة برمضان ، قالي ان اه الأهلي فاوضني وقعدت مع الكابتن الخطيب وكانت مقابلة رائعة ومكنش ليا غير طلب واحد اني عايز اكمل مشواري الاحترافي وفي النادي قالولي هتجدد معانا ولو جالك عرض يليق معندناش مشكلة”.
وأشار : ” رمضان بيكلم نادر بيقوله ايه أخبار العروض قاله العروض الاوروبية صغيرة ولا تليق ، في الاسبوع الاخير دا بقى نادر قعد مع رمضان وقاله مش قدامنا غير الأهلي وحصل اجتماع مع مسؤولي الاهلي بس رمضان قعدة لوحده مع أمير توفيق لانه زعل انه مجابلوش عرض أوروبي ، أمير قاله خلاص قربنا نخلص وعايزين امضاء منك لهدرسفيلد انك بتتفاوض مع الأهلي وموافق”.
وأضاف “شوبير” خلال تقديمه حلقة جديدة من برنامج “ملعب أون”: “رمضان راح قال لأمير توفيق انا هفتح مع وكلاء تانية لان نادر شوقي مجابليش عروض ، قعد مع صديق وكيل ليه وقاله عايز عرض فا قاله هجيبلك عرض من اسيا ونجح فعلا انه يجيبله عرض من فريق اسيوي ودا اللي قاله علي صقر وكيل رمضان التاني”.
وتابع: “: بيراميدز راح مكلم علي صقر وقاله مفيش مشكلة ونفتح كلام بينكم وبين رمضان ، أمير بيتصل برمضان وبيقوله احنا مخلصين خلاص ها ، رمضان زعل ان الكلام اللي بينهم بيتعرف برا وزعل وان الامر دا سري ، أمير قاله محدش اتكلم على ارقام او اي حاجة والناس كلها بتجتهد ، رمضان راح قاله خلاص حط اللي في العقد وانا موافق عليه”.
وواصل: ” أمير بيكلم رمضان تاني بيقوله انت هتروح بيراميدز بيقوله وليه لأ دي عروض ومتقدمة ليا ، ظهر نادر تاني بعرض تركي بس العرض معجبش رمضان لأنه كمادي قليل، رمضان قالي حسيت ان نادر شوقي كل اللي عايزة هو اني أوقع للأهلي وخلاص ومحدش بياخد رأي في الكلام ويقولهم متقلقوش رمضان موقع موقع”.
واستكمل : “قلتله يابني ما انت اللي قولت خلاص حطوا اللي تحطوه وانك موافق ، قالي ماشي بس انا عندي عروض من هنا وهنا ، انا اه رجعت عشان خاطر الأهلي وخدمت النادي بس أسألهم انا كنت باخد كام في انجلترا ، انا اكتر حاجة ضايقتني انهم قالو للخطيب اني طلبت مهلة ودا محصلش”.
وأتم :” قلتله ما انت عمال تأجل يا رمضان فا واضح ان دي مهلة ، قالي بيراميدز ضغطوا وعرضوا عرض كبير جدا وانا راجل عندي مسؤوليات كتير وعرض ميترفضش وعشان مستقبلي واسرتي ، قلتله يا رمضان ف النهاية يعني ان دا تأمين مستقبل ، قالي اه دا تأمين مستقبل”.
