نجح نادي الزمالك في تحقيق فوز هام على نظيره الإسماعيلي بثلاثة أهداف مقابل هدف وحيد في المباراة التى جمعت الفريقين على أرضية استاد القاهرة الدولي، ضمن منافسات الجولة الـ34 والأخيرة من عمر بطولة الدوري العام الممتاز لكرة القدم.
ومن جانبه قال أمير مرتضى منصور المشرف العام على الكرة بنادى الزمالك عقب اللقاء :”ببارك لجمهور الزمالك و اللاعيبة، احنا خدنا اللي عايزينه من الدوري الموسم ده في ظل الضغوطات اللي حصلت و ظروف الموسم”.
وأشار:” إن شاء الله الموسم ده يخلص على حاجة كلنا بنحلم بيها، واحنا مركزين في أفريقيا بشكل كبير جداً، و بنوعد الجمهور يشوفوا نفس النتيجة والمستوى اللي شافوه في المغرب”.
وأضاف “أمير” :”احنا بنعتبر نفسنا لعبنا هناك والنتيجة سلبية وغير مرضية، و تركيزنا كله في مباراة العودة، وفي شوط خلص هناك، ولسه في شوط هنا، و مكسبنا في المغرب عمل علينا ضغط هنا في ماتش العودة، وشغالين على اللاعيبة فنياً و بدنيا، وفيه روح عالية بين اللاعبين لتحقيق البطولة”
وتابع:” الدوري خلص وبعد خصم النقط و كل حاجة كانوا عايزين يعملوها، احنا خلصنا الموسم زي ما احنا عايزين و ضد كل الظروف اللي كانت بيحاولوا فيها اننا مانبقاش موجودين في المركز المؤهل لأفريقيا”
وبهذا الفوز ضمن الزمالك حسم المركز الثاني في جدول ترتيب الدوري العام، برصيد 71 نقطة، بعدما خاض 34 مباراة حقق خلالهم الفوز فى 21 مباراة وتعادل في 8 مواجهات وهزم فى 5 مباريات، فيما سجل 50هدفًا واستقبل 27 هدفًا.
