أحمد الشيخ يفجر مفاجأة : وقعت لـ بيراميدز قبل نهائي أفريقيا … و زعلت وصعبت عليا نفسي بعد استغناء الأهلي عني !!
كشف أحمد الشيخ لاعب الأهلي السابق أنه وقع لفريقه الحالي بيراميدز قبل نهائي دوري أبطال أفريقيا أمام الزمالك، بعد اتفاق بين مسئولى الناديين وتم الاتفاق على تأجيل الإعلان لما بعد نهاية بطولة أفريقيا.
وقال “الشيخ” :” الأهلي قرر الإستغناء عني وعدم ضمي للقائمه بشكل مفاجئ وقبلها بـ10 أيام كان عندي عرض من بيراميدز والأمور وقفت فجأه رغم ترحيب النادي الأهلي بعرض بيراميدز”
وأشار :” أمير توفيق كلمني وقالي إن فيه عرض من بيراميدز وانهم مرحبين وانا وقتها مكنتش أعرف أن في عرض في صفقة تبادلية”
وأضاف “الشيخ” خلال استضافته في برنامج ” اللعيب” مع الإعلامي ” مهيب عبد الهادي” :” فسألته الدنيا هتمشي ازاي انا بعد 10 ايام عندنا نهائي أفريقيا وانا نفسي اكون مع الفريق في التوقيت ده وقررنا تأجيل الكلام لحد بعد النهائي والقيد كان هيقفل يوم 30 نوفمبر”.
وتابع :” الأهلي اداني الضوء الأخضر اني اتواصل مع بيراميدز عشان احدد راتبي والأمور المادية وفجأه لقيت السوشيال ميديا اتقلبت بسبب عرض تبادل الصفقات وان محمد فاروق هيجي الاهلي وانا هروح بيراميدز”
وواصل :”النادي الأهلي بعدها طلع قرار إن موسيماني مش عايز فاروق والصفقه وقفت بعدها وكده بقى بيراميدز مطالب يشتريني بفلوس من الأهلي وأن الموضوع اتقفل وكانوا عايزين 15 مليون تقريبا وبيراميدز تراجع بسبب الرقم ومكنتش عارف الكواليس اوي والموضوع اتقفل لحد النهائي”.
وأكمل ” الشيخ” :” لحد وقتها انا مش عارف انا قاعد ولا ماشي من الأهلي وكل يوم بتكلم مع سيد عبدالحفيظ انا وضعي ايه وكان بيقولي انت مكمل والراجل عايزك وفي عقد جديد ليك وهنوثقه وفضلت في الكلام ده ليوم النهائي”.
وأتم :”بعد النهائي بقى الكلام اتغير وقالولي لا فيه عرض جايلك من التشييك وكان ماديا الوضع صعب أوي ومش حلو فكنت لازم اللحظة دي احسمها فورا والأهلي قرر اني مكنشي موجود في القائمه وزعلت جدا وصعبت عليا نفسي”.
