كهربا يكشف حقيقه علاقته بمرتضى منصور اثناء تواجده في الزمالك .. كان ابويا فعلا وهاجمته وشتمته في وسط النادي – فيديو
كشف محمود عبدالمنعم كهربا لاعب نادي الزمالك الهارب الي نادي الأهلي في تصريحات مع الاعلامي سيف زاهر عبر برنامج ” ملعب أون ” المذاع عبر شاشه قناه اون تايم سبورتس كواليس ازمته الشهيرة مع مرتضى منصور قبل مباراه الديربي.
وقال كهربا : مرتضى قبل مباراة الأهلي سابقا أمام الكاميرات : هو كان جايب اللاعيبة القدامى كلهم وكان فيه 4 كاميرات ومرة واحدة وهو واقف بنتكلم، وكان كابتن عبدالواحد السيد واقف جنبي، قالي وأنت بقا يا عم كهربا لو حد في الماتش شتمك بامك او أبوك وقالك مش عارف أنت بتكلم مين، اوعى بقا تتجننلي وتتعفرت وتعملي والحاجات بتاعتك دي.
وواصل كهربا : فقلتله بعد إذن حضرتك الكلام ده تمنتجه عشان والدي ووالدتي بيتفرجوا بليل على القناه بتاعة الزمالك وبيشوفوا الحاجات دي لأن كان قبلها كذا سابقة وأنا عندي والدي ووالدتي أهم حاجة ومش عايزهم يسمعوا عني أي كلام عني.
وأضاف: فالمهم قالي أنت هتشوحلي، فقلتله “اه” أنا اشوحلك وكذا كذا كذا، فأنا لفيت بصراحة بقى ” شتمت جامد ” يعني ودخلت على الأوضة أخدت دُش وبلبس وبلم جزمي وحاجتي وخارج لقيته في وشي.
وتابع كهربا : قالي أنت هتروح فين مش هسيبك، قالي تعالى نطلع على المكتب وراح ماسكني من إيدي، قلتله أنا معاك، شوف عايز توديني فين يعني، فهو لما مسكني من إيديا بطلع التليفون أكلم أبويا عشان يسمع كل حاجة وأنا ماشي، بصراحة اللاعيبة مسابونيش خالص كلهم وقفوا جنبي، فطلعنا فوق جابلي عصير ليمون قالي اهدأ أنت ابني مفيش أي حاجة واتصالحنا فوق وقلتله متزعلش مني أنت زي والدي مفيش مشكلة وراح جاب المدير الفني واللاعيبة كلها مسابونيش لحظة.
وأكمل كهربا : إنه كانت لديه مشكلات كثير للغاية مع رئيس الزمالك ” مرتضى منصور ” و مشكلتي كلها كانت معاه هو إن يبقى واقف واللاعيبة كلها مع بعض والكاميرات موجودة ويتكلم عليا في أي حاجة، يعني لازم اسمي يكرره
في أي حاجة، مع إن لما كنت أدخله لوحدي كان يعملي اللي نفسي فيه.
وتابع “كهربا” أنه بالفعل كان ينادي على مرتضى منصور بـ يا بابا , مضيفًا أن علاقته به كانت جيدة وكان بمثابه الاب له وكان بيساعدنا، في ماتشات كثير نكسب تاني يوم المفروض المكافأة فهو يجي فبدل مثلًا ما بناخد اثنين أقوله عشان خطري خليها عشرة، قدام اللاعيبة كلها، تمام، خلاص عشرة، وخصوصًا السنة اللي فاتت.
وأضاف أن سبب توتر العلاقة بينه وبين مرتضى منصور اللي حواليه كان بيسخنوه عليا، وأنا مكنتش بستحمل، مينفعش حد مثلًا يقولي أنت مش كويس ولا أنت كذا، عمري ما هقبل على نفسي كدة مهما كان مين.
شاهد :
