فيديو | لأول مرة مصطفى محمد يتحدث عن أزمته مع الزمالك ونيته للاحتراف – شاهد المداخلة بالكامل

كشف مصطفى محمد مهاجم الفريق الأول لكرة القدم بنادي الزمالك عن كواليس العروض الاحترافية المقدمة له لخوض تجربة الإحتراف الخارجي خلال الفترة الماضية، مشيرًا إلي أن يرغب في تحقيق حلمه بخوض تجربة الإحتراف.

ويتمسك مصطفى محمد بخوض تجربة الإحتراف خلال الفترة القادمة، خاصة بعد تقديم عرض رسمي من قبل نادي سانت إيتيان الفرنسي.

وقال “مصطفى” :” انا طالع أوضح وارد علشان حبا فى جمهور نادي الزمالك  وهل حد شاف مصطفى محمد عمل أي مشكلة أو طلب فلوس زيادة قبل كدة”

وأشار :” جالى عرض قبل كدة بـ 200 الف يورو وكنت ساعتها باخد 600 الف جنيه فى طلائع الجيش، وأول ما خلصت إعارة طلائع الجيش قالولى هتروح سموحة أو الإسماعيلي وبعدها رجعت الزمالك لان ده كان حلمي من الأول”.

وأضاف “مصطفى” خلال مداخلة في برنامج ” اوضة اللبس” على قناة ” النهار” تقديم أحمد حسام ميدو :” النادي قالى احنا عندنا حلم بطولة أفريقيا لان ده كان حلمي فعلا وكان جايلى الصيف اللى فات 10 اضعاف اللى باخده فى نادى الزمالك فى تركيا ومرضتش وقلت ده حلم النادي وحلمي اننا ناخد أفريقيا”

وتابع :” ساعتها خت وعدت قدام مصر كلها انى هخرج بعد بطولة أفريقيا، ومش سهل ان اللاعب يجيلة عرض من فرنسا”.

كما وجه مصطفى حديثة لجمهور الزمالك قائلا :” انا عندى 24 سنه والفرصة مش بتيجى بالساهل وكل ما اكبر الفرصة فى الاحتراف بتقل، ومش مضمون أن الأولمبياد تتلعب ممكن تتلغى ممكن العب وحش أو ملاقيش عرض أنا زملكاوى اكتر من أى حد”.

ووجه مصطفى محمد مهاجم الفريق الأول لكرة القدم بنادي الزمالك رسالة قوية إلى مسؤولي لجنة الكرة بالنادي، مؤكدًا أنه يريد وضوح أكثر من قبل مسؤولي النادي في عملية التفاوض حول خوضه تجربة الاحتراف الخارجي.

وقال ” مصطفى” :” انا فى النادي محدش واضح معايا ناس تيجى تقولى انت هتمشى وانت واخد وعد انك تمشى، وترجع تقول لا على العروض المقدمة”.

وأشار: ” انا رديت عليهم انى حلمى إنى احترف وأنا سنى بيكبر ومش بالساهل يجيلى عرض فى شهر 6 و هيكون فى نهاية الموسم وهنكون صعدنا في بطولة دوري أبطال أفريقيا واكيد ساعتها مش هسيب الزمالك فى الوقت ده”.

وأضاف “مصطفى” فى مداخلة مع برنامج “أوضة اللبس” على قناة ” النهار” تقديم أحمد حسام “ميدو” :” لو مشيت فى شهر 6 بعد الصعود في بطولة أفريقيا هيكون وحش فعلا لكن انا عايز امشى دلوقتى علشان ده حلمى، ونفسي ارفع اسم نادي الزمالك برة وانا حاطط خطة لنفسى انى بعد سنه ونص اطلع فى حته أفضل من الدوري الفرنسي”

وعن حقيقة غيابة عن التدريبات الجماعية للفريق أوضح :” اقسم بالله غبت تمرين واحد علشان ظروف صحية لوالدتى، وفى نفس الوقت الناس طلعت تقول مصطفى محمد متمرد”.

وتابع :” علشان مش عارفين يتعاملوا معايا دخلوا الجمهور فى القصة وقالوا مصطفى متمرد، رغم انى مش كده انا طول عمرى بحب الزمالك وعمري ما طلبت أي حاجة إضافية أو فلوس زيادة”

وكشف :”باتشيكو اول ما جه قولته جايلى عرض وانا عايز امشى واحترف والراجل قالى انا جاى للفرقة علشانك انت وكذا لعيب وبعد افريقيا أنا هساعدك انك هتمشى وخت وعد منه انى اخرج للإحتراف”

وتساءل “مصطفى” :” هل مطصفى دلوقتى طلع متمرد وانا غبت تمرينه واحدة علشان والدتى وكان عندي الم في ظهري والظروف كلها جت كدة وانا متوقعش عليا جنيه واحد غرامة علشان انا لم أتمرد على الفريق”.

وأتم :” حابب بس الناس في النادي تكون واضحة وجبت لهم الفلوس اللى عايزينها لكن مش كل شوية حد يجى يقولى حاجة، لكن هنا بيلعبوا بمشاعرى وكل كل شوية حد يقولى حاجة ودى حاجة بتعب الواحد”.

شاهد: