ياسر عبدالرؤوف يحرج الأهلى بعد ايقاف الشناوي : كان يستحق الطرد .. وهذه صحة العقوبة الموقعة عليه

اكد ياسر عبدالرؤوف الخبير التحكيمي انه من حق الحكم ان يدون مخالفة في تقريره ضد اي لاعب عقب انتهاء اللقاء وبناء عليه يتم توقيع عقوبة من اتحاد الكرة

وأشار الي ان محمد سلامة ميدو حكم الاهلي والبنك تساهل مع محمد الشناوي حارس الاحمر الذي كان يجب طرده نتيجة الشد من الزراع

حيث قال ياسر عبدالرؤوف :  القانون حاجه والمسابقات حاجه تانيه، القانون اعطى للحكم حق انه ياخد اجراء بعد نهاية المباراة ، وفي اعتراض وكلام والحكم سابه ومشي وبدأ الشناوي يشده بالشكل ده وكان لازم ميدو سلامة يقف ويواجه ويقرر بكارت اصفر او احمر واللي شايفه كان لازم احمر

واستكمل : العقوبات على الشناوي ممكن الحكم كتب ف تقريره وهتبقى ساقطة كبيره له لانك ماخدتش قرار هو حقك انك تكتب ولكن لازم يتاخد ضده اجراء لانه مطلعش كارت

واستطرد : ممكن يكون اتكتب من مراقب المسابقات وبالتالي لجنة المسابقات اخدت القرار،ممكن عن طريق الفيديو الخاص بالمباراة ومش عارف متاخد به هنا ام لا وكان لازم يطرده اول لما شده ، ومن خلال اللقطة في اعتراض من الشناوي وكلام ومسك للحكم معنى انه لا طلع اصفر ولا احمر ده بيقول انه معملش حاجه لكن اللقطه تستحق الطرد ، وفي لائحة عقوبات من لجنة المسابقات ودي اتغيرت بقدوم اللجنة الثلاثية

وواصل : زي ما الحكم مش من حقه لمس لاعب او مدرب او اداري برده من مش حق اي شخص لمس الحكم ، ولو كان ميدو اخطأ وكتب ف التقرير لازم يتعاقب من لجنة الحكام ومفيش قرار رسمي من لجنة الحكام كل اللي بيتردد عبر المواقع

واتم : وحصل ايقاف مع صبحي العمراوي حكم مباراة الزمالك وانبي وكل المواقع قالت هيتوقف شهر وده حصل ومحكمش من يومها يبقى الكلام صح،انا بقول للجنة الحكام اطلع دافع عن حكامك لكن المواقع تطلع تقول استبعاد الحكمين لنهاية الموسم من مباريات الاهلي واكيد الكلام له اساس