رد البرتغالي جايمي باتشيكو المدير الفني لنادي الزمالك على الانتقادات التي توجه إلى أحمد سيد زيزو لاعبي نادي الزمالك، وذلك بعد تراجع مستواه خلال الفترة الماضية.
فاز نادي الزمالك على ضيفه الاتحاد السكندري بهدفين نظيفين في المباراة التي أقيمت بينهما على ستاد القاهرة في إطار الجولة 13 من بطولة الدوري المصري الممتاز.
واحرز الفريق هدفه الاول من ركلة جزاء حصل عليها سيف الدين الجزيري وسجلها أحمد سيد زيزو بنجاح في الدقيقة 60 ليتقدم لأصحاب الأرض بالهدف الأول.
وفي الدقيقة 77، نجح يوسف أوباما في مضاعفة النتيجة لنادي الزمالك برأسية رائعة استقبل بها عرضية إمام عاشور من الجبهة اليمنى
وقال” باتشيكو” :”مش عارف ايه حاسس ان في ناس كتير مش بتحب زيزو مع إن في لاعيبة تانية مستواها بينزل ومحدش بيتكلم”.
وأشار:” زيزو من نوعية اللاعيبة اللي بيشتغل في أماكن كتير في الملعب وانا بثق في قدراته جدا هو الشوط الاول يمكن تراجع شوية لكن قدر يقدم شوط تاني جيد”.
وأضاف “باتشيكو” في المؤتمر الصحفي لمباراة الاتحاد السكندري :” طبيعي أي لاعب لما بيجي له عرض احتراف بيقل تركيزه شوية والعاطفة بتغلب عليه يعني على سبيل المثال مكنتش حابب مصطفى محمد يمشي ولكن دي كانت رغبته وده ممكن أثر على زيزو شوية”.
وتابع :” مبسوط بخلق الفرص وده مهم بالنسبة لي واحراز الهدف بيبقى الاصعب عشان كدة سعرهم بيبقوا أكتر”
وواصل :”في حاجة مكنتش عايز اتكلم فيها في 8 ماتشات دخل فينا هدفين وفي اخر ماتشين دخل 3 اللي عايز اقوله ان الفرق اللي بتسجل كتير بتكسب ماتشات مش بطولات المهم بالنسبة لي اني ابقى واقف دفاعيا كويس واسجل هدفين مش ٤ اكسب بهم ال٣ نقط ”
وأكمل ” باتشيكو” : “في لاعيبة ممكن تتألق على الملعب ده ولاعيبة متقدرش وده اللي حصل في ماتش المحلة اللي فات لازم هيبقى في تفكير في النقطة دي والفريق عنده لاعيبة كتير مميزة وخسارة النقاط طبيعي ”
