باسم مرسي يكشف عن المسئول الذي طلب عودته للزمالك .. ويوجه رسالة لمن عرقل الصفقة

وجه باسم مرسي مهاجم الانتاج المنتقل للمقاصة الشكر لجمهور الزمالك الداعم له ومن طلب عودته للأبيض من اجل قيادة الهجوم

كما وجه الشكر لأيمن يونس لثقته فيه والتحدث معه لطلب عودته لميت عقبة

حيث قال باسم مرسي في تصريحات لقناة اون تايم مع سيف زاهر : بشكر جمهور نادي الزمالك جدًا و بحبهم من كل قلبي و بحب و هفضل احب نادي الزمالك و اي كان المسئول الي رفض تواجدي في نادي الزمالك اكن له الاحترام

وتابع : و بشكر كابتن أيمن يونس الي كلمني و طلب عودتي الزمالك و كان بيتواصل مع مسئولي الإنتاج و لا اعرف سبب توقف المفاوضات و اي كان الشخص او السبب مفيش مشكلة هو نصيبي ان اروح نادي كبير زي نادي مصر المقاصة

وواصل : و حقيقي بحب و بشكر جمهور نادي الزمالك الي بيدعمني علي طول و بص علي الأرقام الموسم ده و بص علي أرقام باسم مرسي و الأرقام هي الي تتكلم مش انا و لما مشيت كان باتفاق بيني و بين المستشار مرتضي منصور ان اروح اليونان و ارجع تاني و القدر الي خلاني امشي و اروح اندية غير الزمالك

واستكمل  : و وارد اكون أخطأت او قصرت ف حق نفسي شوية بس في الاول و الاخر قدر ربنا وانا راضي بيه و علي مدار مشواري لما بروح فريق سواء الزمالك او الانتاج او بيتروجيت يكون هداف الفرقه و هكررها تاني هقول لكل الناس الي رفضت رجوعي لنادي الزمالك فوق دماغي و احترم رأيهم

واضاف : المنتخب حلم لاي لاعب و انا لسه ٢٩ سنة و قدامي المشوار و ان شاء الله هرجع المنتخب تاني و كنت محتاج الفرصه و بعدين يتحكم عليا عشان كده كنت عاوز ارجع الزمالك و اخد الفرصه و اشكر جمهور الاسماعيلي و كان هناك مفاوضات مع الفريق ولكن لم توفق و نادي الاسماعيلي نادي كبير و اشكرهم من خلالك

واستطرد : مصطفي محمد أتمني ان يكون افضل من باسم هو الان يمثل مصر و عاوزه مش يكون احسن مهاجم في مصر بل في العالم

واتم : مستعد ارجع بكره الصبح منتخب مصر اديني فرصه و بعدين احكم عليا و لغة الأرقام هي الي بتتكلم مش اللاعب طوال فترتي مع الزمالك جايب ٥٣ جول و رقم مش قليل و نادي الزمالك هو الي عمل اسم باسم مرسي و انا مدين له بالفضل