إبراهيم فايق ينفعل على الهواء بسبب باتشيكو … “اللي بيحصل ده كارثة وتهريج وبداية دخول النفق المظلم” – فيديو
حذر الإعلامي إبراهيم فايق من فكرة رحيل المدير الفني للفريق البرتغالي جايمي باتشيكو عن الإدارة الفنية للفريق خلال الفترة المقبلة، مشيرًا إلي أن رحيل باتشيكو سيؤدى إلى إنهيار الفريق.
وكانت تقارير صحفية كشفت خلال الساعات الماضية عن وجود نية داخل نادي الزمالك عن رحيل البرتغالي جايمي باتشيكو عن إدارة الفريق
وقال “فايق” :” الكلام عن إقالة باتشيكو وتعيين جهاز فني جديد ده تهريج، ومجرد طرح فكرة رحيل باتشيكو عن الزمالك تهريج صرف”.
وأشار :”هل باتشيكو السبب في أى خطأ حصل، وأكيد الزمالك فريق كبير مش هيحاسب الراجل بالقطعة، ولو الموضوع ليه علاقة بمباراة الترجي تبقى كارثة كبيرة”.
وأضاف “فايق” خلال تقديمه حلقة جديدة من برنامج ” جمهور التالتة” على قناة ” أون تايم سبورت” :” هل باتشيكو السبب فى المشاكل الهجومية في الفريق، وهل هو السبب فى التعاقد مع اتنين مهاجمين واحد منهم معندوش خبرات افريقية والتاني مش هيلعب معاه في افريقيا”.
وتابع :” هل باتشيكو مسؤول عن العلاقة السيئة بين حراس مرمى الفريق، أو مسؤول عن الفرص الضائعة اللى بتحصل، وهل هو مسؤول عن اعتراض اللاعبين على التغييرات بالتأكيد كل الاجابات لا “.
وواصل “فايق” :” لو باتشيكو مشى الفرقة دى كل سنه وانت طيب، وهنبدا نتكلم على أن الزمالك داخل فى نفق مظلم، ودايرة المدربين المصريين”.
وأكمل :”لو افتراض انك هتجيب مدير فني أجنبي الراجل الجديد هيقولك طبيعيى أنا مش مسؤول عن الفرقة الحالية ولا الاختيارات الموجودة محدش يحاسبني وبعدها يمشى ونفصل في دوامة تغيير المدربين”
وأكد :” الزمالك لو مشى باتشيكو هيرجع بالزمالك سنيين كتير للخلف، والراجل ده مينفعش يمشى ولو عايز تظبط الدنيا خد قرارات من شأنها تعيد ترتيب الأمور داخل الفريق”
وأتم “فايق” :” لو مشيت المدير الفني هتبقى ضربت مفك كبير في الفرقة وهتزعل وتجيب ناس تزعل وتندم على القرار ده، ولو عايز تظبط الدنيا شد الفريق إداريًا، وباتشيكو ساتر الدنيا ورحيله هيكشف أمور كتير”
شاهد:
