طارق يحيى يعلن خطوات تصعيدية ضد لجنة مجاهد بعد قرارها بتحديد مباراة فاصلة لشباب الزمالك أمام الأهلي

أعلن طارق يحيى رئيس قطاع الناشئين في نادي الزمالك عن الخطوات التصعيدية التي اتخذها النادي لرفض خوض المباراة الفاصلة التى أعلن عنها اتحاد الكرة لحسم بطولة الشباب بين الزمالك والأهلي مواليد ” 99″.

كان اتحاد الكرة قد أعلن في وقت سابق، عن طريق إدارة المسابقات، إقامة مباراة فاصلة بين فريقي الأهلي والزمالك مواليد عام 99 لتحديد بطل مسابقة دوري الجمهورية بعد الأحداث التي صاحبتها.

وأكد ” يحيى” : “موقفنا سليم وفقا للائحة احنا ابطال الدوري وفنيا مش هقدر العب والبطولة السنة الجاية مش هتبقى موجوده والاتحاد قال ملهاش أهمية فالغيها، وانا كزمالك منتهى الصعوبة لعب المباراة هي الدنيا بتمشي حسب الاهواء ومفيش لوائح وبتطق لوايح في امور اخرى لا”

وتابع :”إحنا هنقدم طلب تاني للجنة المؤقتة اللي بتدير النادي هلعب بمين وعندي 6 لعيبة موقوفين والقرار النهائي لهم في ظلم وعدم تكافؤ فرص وتواصلنا مع المستشار هشام ابراهيم شفويا وهنكتب له مذكرة بكره”.

وأشار :” فريق 2003 بينا وبين الأهلي 5 نقاط وقالوا إن إنبي هياخد 5 نقاط علشان فريق الجيش ،شارك لاعب والدنيا ملخبطه، عندنا ماتشين لازم نكسبهم أمام إنبي وسيراميكا وبعدهم يتوج بالبطولة”.

وشدد ” طارق” :”بنتعرض لظلم غير طبيعي دايما بنلعب على ملعب الترتان في القطاع والنهارده طلبوا مننا نلعب على ملعب الفريق الأول نجيل طبيعي طبعا دي مش حجة ولكن قالولنا ده أمنيا ولازم يتنقل”.

وأضاف ” يحيى” خلال تصريحات لقناة ” الزمالك” : ماتش الاهلى النهاردة قدمنا مستوى سئ وده أول مباراة لفريق 2003 بالمستوى ده والهدف جه من كرة ثابتة وكنا لنا ضربة جزاء واضحة وضوح الشمس ومتحبتش”.

وأتم ” يحيى” :” ربنا يهدي ويوفق الناس لاتخاذ القرار السليم وأنا كرئيس للقطاعات ومعي جمال عبدالحميد وبدر حامد قولنا مش هنقدر نلعب المباراة الفاصلة”.