مرتضى منصور يبدأ الحرب.. يفتح النار على هشام حطب و رموز الزمالك ويحرج حسين لبيب – فيديو
ظهر المستشار مرتضى منصور في مقطع فيديو جديد نشره عبرة صفحته الرسمية على مواقع التواصل الاجتماعي، ضمن الحملة التي بدأها مؤخرة للهجوم على منتقديه وذلك بعد حصوله على حكم من محكمة القضاء الإدارى بإلغاء قرار إيقافه من قبل اللجنة الأولمبية المصرية.
وقال ” مرتضى” :” أنا جهزت رد مطول من ثلاث أجزاء على هشام حطب وإزاى ولع الحطب في نفسه، والرد على الإعلامي معتز عبد الفتاح، وأحمد الشيخ في وزارة الشباب والرياضة”
وأشار :” أحمد الشيخ كتب كلام كذب لوزير الشباب والرياضة وبناءًا على تم حل مجلس إدارة الزمالك”
وأضاف ” مرتضى” في الفيديو الذي نشره على صفحته الرسمية على مواقع التواصل الاجتماعي :” بقول لجماهير الزمالك طظ في الرموز ومحدش فيهم فكر كلمنى لما تعبت أو لما خدت حكم ضد هشام حطب”.
وتابع :” سواء حسن شحاتة أو فاروق جعفر أو غيره، وهما عندهم غيره منى ان ازاى مرتضى مكنش لاعب فريق كرة وجه عمل كل الإنجازات دي في النادي”.
وواصل ” مرتضى” : “الشعب المصرى كله فرحان والدليل كل شويه هاشتاج فرحة بعودة مرتضى منصور، لكن دول رموز من ورق”.
وأكمل ” مرتضى” : ” بشكر رضا عبد العال وطارق يحيى ومدحت عبد الهادي، وأحمد الكأس، وعبد الحميد بسيوني، وطاهر أبو زيد، وغيرهم من نجوم الكرة اللى كلمونى عشان يدعموني بعد الحصول على الحكم”
وأستطرد :” لكن فيه ناس تانية كانت زعلانة انى خدت الحكم، وفي قلوبهم غل ودول رموز من ورق وكل الخير اللى هما فيه دلوقتي من الزمالك”
ووجه ” مرتضى” حديثة الى حسين لبيب رئيس لجنة الزمالك :” بسال الكابتن حسين لبيب المحترم ليه لغاية دلوقتي محتفظ بـ سيد السبكي أبو خيرت السبكي الإرهابي اللى قتل 17 ضابط من ولادنا، وإزاى لغاية دلوقتي لسة شغال في النادي”.
كما وجه حديثه إلى المستشار هشام إبراهيم نائب رئيس اللجنة السابقة :” ويقول لهشام إبراهيم، شوفت ازاى ان مرتضى اللى بقاله 7 شهور خارج نادي الزمالك الجماهير تتمنى انه يعدى من قدام النادي، وإنت اللى لسة ماشى امبارح محدش طايقك، ولو أنت دكر امشى من قدام النادي بس”
وقال ” مرتضى” :” أي إنسان عمل مداخلة يشكر اللجان اللى جت على فوز فريق السلة ده إنسان منافق لإنى أنا اللى عملت الفريق ده و دول أولادى انا اللى جبت الفريق ده كله بما فيهم المدير الفني، وانا اللى متعاقد مع كل فريق الطائرة، واليد والقدم”.
وأكمل :” قناة الزمالك مخطوفة ونسبة المشاهدة بقت زيرو، وبقول لفتحى سند أنا اللى معينك، ومش عارف مين اللى عين محمد أبو العلا الساقط، لكن اللى عينك ومنعنى اتكلم انا هقول اسمه ووظيفته فى الفيديو التالت، وانا لسه باقى على الخيط الأخير لو اتقطع هقول كل حاجة ”
وأتم ” مرتضى” :” أنا طول عمرى ساند مؤسسات بلدى وأنا لو مسنود مكنتش سقطت فى انتخابات مجلس النواب في ميت غمر، ومكنتش خرجت من مجلس الزمالك، لكن انا طول عمرى ساند وعمرى ما كنت مسنود من حد”.
شاهد:
