كشف عماد متعب مهاجم الأهلي السابق، أن هناك أحد المسؤولين في النادي الأهلي، عمل خلال الفترة الماضية على تحريض البرامج الفضائية عليه، بسبب حديثه عن بيتسو موسيماني المدير الفني للأهلي.
وكان عماد متعب قد انتقد تغييرات بيتسو موسيماني في لقاء القمة، مؤكدًا انها اعطت الفرصة للزمالك في العودة للقاء مرة أخرى.
وقال ” متعب” :” فيه مسؤول كبير في الأهلي ليه علاقة بمنظومة الإعلام ، كلم القناة اللى شغال فيها بعد لقاء القمة أمام الزمالك، وكلم كل القنوات علشان تهاجمني بسبب انى اتكلمت بشكل شاف أنه مش كويس على موسيماني بعد مباراة القمة”.
وأضاف ” متعب” في تصريحات لبرنامج ” آخر النهار” على قناة “النهار” : “اللى قولته خلال الاستديو التحليلي للقاء، أن موسيماني عمل 70 دقيقة بشكل هايل وعمل جيم كبير، لكن تغيير اقفشة وشريف، ضيعوا على الأهلي الفوز بنتيجة تاريخية”
وتابع :” الكلام ده معجبش المسؤول ده، وراح كلم القناة اللى انا شغال فيها وقالهم إزاى تسمحوا لعماد متعب يهاجم موسيماني، وكلم بقية القنوات علشان الناس تطلع تهاجمني”.
وواصل ” متعب” :” بقول للمسؤول ده عيب تعمل معايا كده، وانا متربي طول عمرى في النادي الأهلي، ومش بتكلم غير لمصلحة الأهلي، وأنا مش هسكت وكلمت المهندس خالد مرتجي وأخبرته بهذا الأمر، وهكلم الكابتن محمود الخطيب”.
وأتم ” متعب” :”رنيت على المسؤول ده شخصيًا ومردش عليا، ولو كلمته هيقوله محصلش، ودى مش أول مرة يعملها معايا، قبل كده في وقائع كبير كان يحرض الناس عليا في المواقع والقنوات علشان الناس تهاجم عماد، وبقوله ملكش دعوة بيا”.
