“كل حاجة كانت غلط”.. تعليق ناري من عمرو أديب على خسارة الزمالك للسوبر أمام الأهلي – فيديو
علق الإعلامي عمرو أديب، علي فوز النادي الأهلي ببطولة السوبر المحلي على حساب الزمالك بثنائية نظيفة في المباراة التي جمعت الفريقين على استاد هزاع بن زايد في دولة الإمارات العربية المتحدة.
وقال “عمرو”:”النهاردة الزمالك كان بيلعب بـ 8 أنفار في الدفاع والأهلي النهاردة كان انتحاري وبيخش على كل كورة وبيلعب على الزمالك في كل مكان وبيشترك في كل كورة”.
وأضاف خلال برنامجه “الحكاية” عبر شاشة “mbc مصر”، مساء الجمعة، إن الزمالك لم يخض المباراة بالروح المطلوبة، قائلا:”الزمالك كان بيلعب بالشوكة والسكينة ومفيش الالتحام القوي والروح العالية، ويقولك أنا الزمالك كسبان بطولتين دوري وكاس مفيش كدة”.
وأشار إلى أن لاعبي الأهلي خاضوا المباراة بانتحارية، بينما تحدث عن لاعبي الزمالك قائلا: “اللاعيبة خاضوا المباراة بالعتولة.. يعني كان عندهم ثقة زايدة، وإمام عاشور كان عاوز يرقص التاريخ كله”، مستكملا بسخرية: “الزمالك كان فاكر هياخد البطولة بالفانلة الزرقاء أهي بقت ليلة زرقاء”.
وتابع: “اللي تعب النهاردة هو الأهلي ولحد آخر لحظة اللاعيبة كلها صح وبتلعب في مراكزها صح ونص الزمالك بيلعبوا في مراكز غلط ومن امتى زيزو بيلعب رأس حربة وشيكابالا بيلعب في الشمال، كله في الزمالك كان شمال ومش قادر”.
وأكمل: “النهاردة الزمالك خسر بجد، وعادة بقول حظ الأهلي نار إنما الأهلي النهاردة كان نار مش حظه اللي نار وكان بيكافح لحد اَخر لحظة من أجل الفوز”.
واستطرد”عمرو”:”لا حكم ولا جمهور ولا أرض ولا أي حاجة انما الأهلي اللى كان أحسن، ولو الزمالك هيفضل مكمل كده واصل الظروف والحكم قول علي الزمالك يا رحمن يا رحيم وانسوا الدوري والكأس تاني، الأهلي لما بيتفتح معاه الحظ قول يا رحمن يا رحيم”.
وأختتم “عمرو”:”الزمالك لو عايز يكسب لازم يعيد النظر في اللاعيبة الجديدة اللى جت وسلوكيات اللعيبة وحالة التراخي اللي كانت عند اللاعيبة النهاردة، الزمالك لو هيكمل بالشكل ده انسوا الدوري والكاس”.
شاهد:
