فتح جمال عبد الحميد عضو مجلس ادارة الزمالك، النار على معلقي المباريات بالدوري المصري، بسبب عدم الحياد، ومحاولتهم التقليل من لاعبي الفارس الأبيض والتمجيد في المنافسين.
وقال جمال عبد الحميد في تصريحات ببرنامج زملكاوي عبر قناة الزمالك: “المعلقين بيثيروا الفتن،
يقولوا على لاعبي المنافس اقوياء والريال وفرق اوروبا كانوا بينافسوا على ضمهم، يجي للاعبي الزمالك لسه مندمجوش ونستنى، انت مالك”.
واضاف:” زكريا الوردي شوف طريقة قطعه للكره، واداءه هو بيلعب برجوله وجديه، والمعلق يقول الزناري لسه مندمجش، واللاعب كان عالمي، بيطلع اعلى مني عمري ماشوفت حد بيطلع اعلى مني غيره هو الونش، وكان بيلعب على مهاجم قوي جدا وهو ايبوكا”.
وشدد عبد الحميد:”بعد اذنكم، بتقيموا ليه؟، ده عالمي ده صفقة العمر، انما لاعبي الزمالك مندمجوش انت بتعلق على مباراة بتهمد لعيبة الزمالك ليه؟ “.
واوضح:”لنا حق نقول مش عاوز المعلق ده، لانه بيهمد لاعيبه الزمالك وبيعلي في المنافس”.
واكمل عبد الحميد:” بحيي مؤمن حسن على تعليقه امس على مباراة الزمالك، وقال لما الكرة تقف اقول لكم المعلومه، اول مره اسمع معلق في الجيل الحديث يقول لما الكره تقف هتكلم، وعمل زي المعلقين الكبار ميمي الشربيني والجويني ومحمود بكر”.
واردف:” لكن في معلقين اخرين محضرين 15 ورقه لازم يقولهم ويكلم على لعيبه الزمالك الجديده وتقول لسه مندمجش، وبيحللوا الاخطاء التحكيميه مفيش غير30٪ منهم نسمعهم لانهم محايدين و70٪بنقفل الصوت”.
وزاد عضو مجلس ادارة الزمالك:”انت بتوقع نادي ليه مصلحتك ايه، انا زعلت انهم عاوزين يفطسوا صفقاتنا حاولوا التقليل من زيزو ولكنه لم يهمد ولم يستمع لهم واصبح افضل لاعب في مصر وبن شرقي قالوا انتم جايبينه ليه والجمهور كان بيعيط عليه وهوماشي”.
واختتم:” انت معلق، خليك محايد علشان تنال احترام كل الناس، ومش علشان ترضي انتمائك تضيع مجهود ناس ومتقوليش محدش له انتماء لا المعلقين اهلاويه وزملكاويه، مش عاوز اشك انك سمسار بسبب اسلوب اشادتك ببعض اللاعبين وهجومك على لاعبينا”.
