حرص أمير مرتضى منصور المشرف العام على الكرة بالزمالك، على توجيه رساله للبرتغالي المدير الفني السابق للفارس الأبيض، ولأسامه نبيه الذي تولى القيادة الفنيه للفريق بدلا منه.
وقال امير مرتضى في مداخله هاتفيه ببرنامج “زملكاوي، عبر قناة “الزمالك”:” بشكر مستر فيريرا والجهاز المعاون له، الفتره الاخيره مكنش في توفيق، هم فرحونا السنه اللي فاتت هو عمل المستحيل بامكانيات اقل، فتقلبنا للتعثر كان غير مقبول لان مفيش فرقه كبيره هتتحمل تخسر عدد نقط كبير والخروج من الكأس وتخسر من الاهلي”.
واردف:” ده لاينتقص من تاريخ فيريرا، او مجهوده مع الزمالك، وجهة نظري اننا بنخسر كره والفترة الاخيره كان في سوء توفيق، وعلى المستوى الشخصي اتشرفت ان اشتغلت معاه، وكان عنده صلاحيات كبيره ومطلقه، واخد دعم محدش اخده”.
وشدد مرتضى: “ما حصل من اخفاقات كان كثير، وبتمنى له التوفيق وهيفضل رمز تدريبي كبير وحفر اسمه في تاريخ الزمالك بالفوز بـ2 دوري و2 كأس”.
وواصل:” كابتن اسامه كان بيحاول يشوف شغله مع فيريرا، وهو مكنش بيحب يتعاون مع الجهاز المصري،كان بيستمع فقط للاجانب، وكابتن اسامه احترم رغبته في عدم السماع لوجهة نظره وتقدم باستقالته”.
واختتم: “كابتن أسامه طلب يمشي لان مكنش له دور وكابتن اسامه عنده Dna الزمالك، وعنده كل المقومات اللي تخليه مدير فني وعنده خبرات من العمل في المنتخب مع كوبر ومع فيريرا، وولاد الزمالك هيبقوا اكتر ناس عارفه المشاكل والتفاصيل، وممكن الظروف الصعبه هتخلق مدير فني كبير هنقدمه للكره المصريه، وبتمنى له التوفيق”.
