هدد المستشار مرتضى منصور رئيس نادي الزمالك، بالحديث عن المسكوت عنه في ملف الرعايه وما يحدث مع الفارس الابيض مقارنه بكم التسهيلات للأهلي.
وقال مرتضى منصور في مداخله هاتفيه ببرنامج “زملكاوي” عبر قناة “الزمالك”: “احمد موسى اللي بيقول اهلاوي وهو ميعرفش الكرة مدوره ولا مربعه جاب محامي الهارب كهربا واللي له الحق الزمالك مجبش حد منه علشان يرد”.
وأضاف:” كهربا اعتدى بالضرب على مقدم طيار طبيب بالقوات المسلحه بنت، ولم يتحدث احد في الاعلام عنها، ولا على المحضر المحرر ضده، لا احنا الاعلام الفاسد والجزمه في بوقنا يا مرتشين يافاسدين “.
واضاف: “الموضوع مبقاش زمالك واهلي، في حاجه غلط في البلد، وحضرة الظابط هي اللي اتحبست رغم الاعتداء عليها بالضرب وكهربا خرج، كل ده ومش عاوزه يلعب، لا يلعب لان اللي حاميه الخطيب وفي الي حامي الخطيب واتبعتلي رسايل روح اعتذر للخطيب وقربت اقول اسمه”.
وشدد مرتضى:” هتقولي انت واخد سنه سجن في قضية سب وقذف مجرد النقض بيوقف الحكم ومش عاوز اتكلم على القضاء”.
واردف: “هكلم بعد الماتش على الرعايه، وليه الخطيب موقعش مع الشركه المتحده، وعمل مصيبه النهارده لوحصلي حاجه هكون اتقتلت، واللي حصل في اللاهلي النهارده مصيبه، نادي محجوز عليه ولنا 9 مليون عند الشركه الراعيه وهو قاعد يختار وبياخد مليارات ويجيب صفقات”.
واشار مرتضى:” نادي محجوز عليه ورئيسه محكوم عليه وفلوس عند الشركه الراعيه مبتدفعاهاش ونادي تاني عنده كل حاجه، بعد الماتش هتكلم عن كل حاجه تخص الرعايه، ومش بخاف الا من اللي خلقني وهفضل اتكلم، وبينقي لاشركه اتصالات بمليار ونص لا، عاوز ابو 5 مليار وبتقولوا الاسماعيلي بيعاني ليه علشان اللي قاعد على الحجر”.
وواصل: “مقدم بلاغات ضد الخطيب ولاواحد اتحرك انما انا كل يوم في محكمه وبلاغ جديد، انتم بتذلوني علشان في ضهركم؟، انتم مش عاوزين مرتضى ممكن تليفون تقولي انت عملت توازن في الرياضه المصريه نوعا ما، لا روح، واروح اربي احفادي”.
واستطرد:” عندي طاقه، ومكمل علشان النادي ولما تجيب له كل الشركات الراعيه دي ويكون معه مليارات يجيب صفقات، وجمهور الزمالك بيقولي فين الصفقات انا هقوله فين الفلوس الموضوع زاد عن حده”.
واستكمل مرتضى: “بقول لمحمد ابوالعنين ولاحمد موسى من حقي ارد في القناة، مش تجيبوا المجرم، ومحامي كهربا واحنا منردش، ابعدوا عن الزمالك لان الصندوق الاسود عندي انا، هتحبسوني، هتقتلوني مبخافش غير من اللي خلقني، وعندي قوة المستغني وسعيد بحياتي وولادي واحفادي”.
واختتم:” ارحموا الزمالك وجماهيره، الخطيب عنده خساير بالملايين ومحدش بيحاسبه، انا مش هسيب مصر وخايف على الزمالك وشوفتوا السنه اللي مشيت فيها كانت خراب وال10 سنين خراب ايام ممدوح عباس”.
واختتم:” انا على الاخر، وربنا يوفق ولادنا يوم السبت ويطلع ماتش كويس، ويتذكروا انهم اخوات، ويكفينا السحر والسحره واللي حصل مع الهاني سليمان والشناوي عمره رجله كانت في الشمال ويصد كده،
كفايه قرفنا”.
