تجاهل طارق يحيى مقدم برنامج زملكاوي عبر قناة الزمالك الحديث عن حبس مرتضى منصور رئيس الفارس الابيض في قضية سب وقذف محمود الخطيب رئيس الأهلي، ولم يتطرق للأمر من قريب اوبعيد، بل خصص الحلقه للحديث عن الفريق والخسارة من الترجي.
واصدرت محكمة النقض امس حكم بتأييد حبس مرتضى منصور لمدة شهر في قضية سب وقذف محمود الخطيب رئيس الأهلي.
وحرص طارق يحيى علي الحديث عن خسارة الزمالك من الترجي وكذلك سقوط منتخب الشباب برباعيه نظيفه أمام السنغال.
وقال طارق يحيى: “الزمالك بيمر في الفتره الحاليه بحاله من انعدام الوزن وفي تدهور في النتائج وكل شويه نقول الوضع بيتحسن ولكن مفيش حاجه بتحصل” .
واضاف: “الاول ابتدينا بماتش السوبر ثم ماتشات الدوري ودلوقت خسرنا من بلوزداد ومن الترجي وبنستنى التحسن لكن مفيش نتيجه .
وشدد يحيى:” انت بتلعب باسم نادي الزمالك بتدافع عن الشعار اللي انت لابسه ، محدش يجي يقولي ويتكلم ويزايد على حبنا للنادي ، الناس عارفه مين طارق يحيى ومين عبد الشافي صادق وعارفين احنا مين”.
واشار: “احنا على ايامنا مكنش فيه احتراف بالشكل اللي موجود دلوقت ، فيعتبر احنا كنا هواه ، كلنا كنا من مدرسه الزمالك مكنش عندنا محترفين غير كوارشي ممكن وحب النادي مننا ومن الجمهور”.
وواصل يحيى:” الجيل الحالي لازم يبقى نص الفريق او اكتر من ولاد النادي يمكن دلوقت مفيش غير شيكابالا ، لكن على ايامنا احنا كان في ايمن يونس والعبد لله طارق يحيى وعادل المأمور وحماده عبد اللطيف، حتى جمال عبد الحميد لما جه من الاهلي اتزرع فيه dna الزمالك ، وكان معانا حسين السيد وحسن شحاته وفاروق جعفر’..
وتابع: “انا مش بتكلم على الجيل ده انه حاجه وحشه ، لكن انا بتكلم ان الجيل الحالي لازم يتزرع فيه dna الزمالك لازم متقبلش انك تخرج متعادل لازم يبقى اهم حاجه عندك المكسب، الاحتراف أثر بشكل كبير ولكن لازم انت كلاعب لا تقبل الا المكسب ، عشان لما تجيب لعيب من برا وتحطه جنب ولاد النادي يتعلم يبقى عنده شخصيه الزمالك”.
واختتم الحلقه قائلا: “ان شاء الله الزمالك يعود استقراره وفرحته مع جماهيره، مهما بكاني بيجي يوم وافرح معه من تاني”.
