“مش هعتذر للجماهير مش أنا صاحب الصفقات”.. مقدمه ناريه من قناة الزمالك تجاه الإدارة ولاعبي الفريق!!-فيديو

هاجم محمد طارق اضا مقدم برنامج “أخبارنا” عبر قناة “الزمالك”، لاعبي الفريق الأول لكرة القدم وإدارة الفارس الأبيض وذلك بعد كم الاخفاقات التي يعاني منها النادي خلال الفترة الحاليه وآخرها الخروج من بطولة دوري أبطال إفريقيا.

وقال محمد طارق أضا في تصريحات تليفزيونيه ببرنامج “أخبارنا”عبر قناة “الزمالك”:” امبارح شوفنا المهزله الكرويه، شوفنا بعض اللاعبين بيلعبوا اومبيلعبوش، مفيش روح وعزيمه لعيبه مدفوع فيها ملايين تخسر 5 بطولات ولسه الموسم مخلصش”.

واضاف:”ومسافرين بعثه للجزائر كنت وفرت ثمنها ولعبت بالناشئين، الفريق خسر كأس لوسيل، والدوري والسوبر وافريقيا والكأس، انت مركز 5 في الدوري، وخارج من دور المجموعات للسنه الـ3 على التوالي بنفس الشكل والاسلوب كوبي بيست ومفيش جديد ايه السبب مش عارف”.

واردف أضا: “اكدب؟، مش هقدر، انافق؟ مش هعرف، مجموعه من الاشخاص بيدفع تمن اخطائها واختيارتها وقرارات الخاطئه بيدفع تمنها الجماهير، مش هعتذر للجماهير انا مش اللي في الملعب، ولا انا اللي جايب الصفقات، مفيش اعتذار مني ولا من اي اعلامي، مش احنا اللي في الملعب كلنا عندنا اخطاء”.

وشدد:” مش بعد كل الكوارث اقول اعتذار واجب، ومش هقول لحد ادعم الزمالك تاني، لما يكون موظف بسيط يشقى ويتعب ويطلع عينه في شغله علشان ياخد مرتبه ويروح للعيبه بتاخد ملايين ويتخاذلوا، ايه وراكم مهم؟، وراك ايه؟، بتصحى تروح تتمرن ايه اهم من الزمالك؟، ودخلنا في صراعات داخليه وخارجيه انتم فين كلعيبه مش هنشيل الليله لشخص الكل اخطئ انتم مين”.

واكمل: “اللي جاي وحش واسوء واوحش بكتير، محدش يقولي كنا كويسين الشوط الاول والجزيري ضيع هدف، احنا هنضحك على بعض ولا ايه؟، هم مجابوش اهداف، انا فين، انا فين في الملعب طول الماتش بيلعبوا على الوينج ليفت انتم كلعيبه مخكم فين؟ المدربين اللي على الدكه فين؟ مش شايفين الجمله اللي بيلعبوها فين خط نصي؟”.

وزاد اضا:” لكم نفس تروحوا تتمرنوا؟، انتم سبب ان ملايين الزملكاوية ماشين وشهم في الارض، مين يدفع حساب ده؟، ولسه ناس بتدافع وناس بتنتقد المدربين علشان ياخد حته من التوته كله بيدور على مصلحته الشخصيه وده سبب اللي احنا فيه، محدش بيدور على الزمالك كله بيدور على مصلحته واللي بيدفع التمن الجماهير”.

واوضح: “النجاح له مليون اب، لما الزمالك اخد الدوري والكل طلع قال ان قولت للعيبه انت كويس، وانا اللي جبت ده، وانا وانا والمحللين قالوا اللعيبه الشباب، لكن الفشل له اب واحد وهم جمهور الزمالك وهم اللي بيشيلوا”.

واشار اضا:” جماهير الزمالك من حبها لناديها كان عندها امل يكون في رجاله يكسبوا بعد هزيمه انبي بشكل ولا اسوء كان عندهم امل انه يكون 11 رجل”.

وزاد: “بجد انا جاي مش عارف اعمل ايه، وساكت من بعد الماتش ومش عاوز اقول حاجه، ولا عارف اقول لحضراتكم ايه، دي الصفقات اللي جبنها، ودول لعيبه اخدت الدوري موسمين، وده شعار الزمالك اللي بنكافح علشانه؟، جماهير الزمالك جابت اخرها مدرب يمشي ويرجع وناس عادي”.

واختتم:” جماهير الزمالك تحملت وهتفضل تتحمل، نتمنى ان شخص متزملك ينسحب من الصوره وانتم عارفين نفسكم كويس كفايه كذب ونفاق وصراعات ومشاكل ياريت نفكر فقط في الزمالك”.