أعلن الإعلامي خالد الغندور، عن رد فعل المستشار مرتضى منصور رئيس نادي الزمالك على عدم دفع الهارب محمود كهربا لاعب الأهلي الغرامة المستحقه عليه لصالح نادي الزمالك حتى الآن.
وقال خالد الغندور في تصريحات تليفزيونيه ببرنامج زملكاوي عبر قناة الزمالك: “ميدو كلمني الصبح وشوفت فيديو له بإن كهربا هيستمر في اللعب لشهور ومش هيتوقف حاليا وقولتله انا مختلف معاك”.
وأضاف:” ورد ميدو قالي عندي مصادر قويه ودخل معنا في المكالمه محامي كبير جدا وعنده قضايا في الإتحاد الدولي وقال لابد أن حيثيات الحكم توصل لكهربا والزمالك ومن حقه يقعد شهر يقرأ في الحيثيات وبعدها يستأنف، وأكد إن دي لوايح لجنة الإنضباط”.
وشدد الغندور:” انا قلت لميدو مش منطقي إنهم يعطوا لكهربا مهله شهرين وكمان شهر للحيثيات، ودخلت على القرار اللي إتبعت للزمالك (وقام بعرض الخطاب)، ومعنى الحكم إن الـ60 يوم يبدأوا بمجرد إعلامك بهذا القرار وده موجه بحالة كهربا، وكلمت ميدو وقالي لوائح لجنة الإنضباط حاجه تانيه، وردي كان إن حالة كهربا شاذه لم تحدث من قبل”.
وأردف: “والقرار مكتوب فيه أنا غير ملزم أعطيك حيثيات القرار ولامطالب أقولك حيثيات الحكم، ولكن يقولك النقاط ومافي القرار فقط، اللي بعته الفيفا مخالف لكلام ميدو، وده كلام الورق وميدو قال هطلع أشرح الكلام في برنامجي”.
وأختتم:” بعد أيام قليله أو شهور كل حاجه هتتكشف إحنا مش في خناقه، كلمت المستشار مرتضى وسألته عن عدم دفع كهربا الغرامه حتى الآن، وقالي بالنسبه لي يلعب أو لا العداد بيحسب، وليا فلوس هأخدها وكل لما بيتاخر الفوائد بتزيد”.
