أعلن المستشار مرتضى منصور رئيس نادي الزمالك، عن تولي أمير مرتضى منصور المشرف العام على الكره بالفارس الأبيض منصب جديد.
وقال مرتضى منصور في تصريحات عبر قناة “الزمالك”:” مجلس الادارة ليس له علاقه بتقييم لاعب هيكون قرار لجنه الكرة، وكذلك تقييم المدير الفني ده عمل اللجنة، وهم لجنة التقييم نهاية الموسم وبدايته لكن ملهمش دعوة بفريق الكره في خلال الموسم ولايتكلموا على مستوى اللاعبين”.
وأضاف: “بقول لجماهير الزمالك الفريق محتاجك في الوقت ده، والتربيه مش بالشتيمه لا بالفلوس سيب المجلس يعاقب والمشرف العام ومدير الكرة يعاقبوا”.
وشدد مرتضى:” اللي قولته عن أحمد عبد المقصود بسبب إن عرفت انه رفض مشاركة دونجا وحسام عبدالمجيد وقالهم انا المدير الفني واختار اللي يلعب رغم انه كان بيشتكي ان فيريرا مبياخدش رأيه هو وأسامه نبيه هو عمل زيه”.
واردف: “قررنا مفيش مدرب أومساعد مدرب بيشتغل ف نادي آخر هجيبه، مش عاوز اعمل مشاكل مع أي نادي، لإن اللي منرضهوش للزمالك مقبلوش على حد”.
وأشار مرتضى:” مجلس الإدارة وافق بالإجماع على تعيين عبد الواحد السيد مدير كره، وفي لائحه إشتغل عليها ميدو وأمير، حضرتك مش عاوز تلعب أحتياطي وهتدخل على الانستجرام أوالفيس بوك وترد على الجمهور هيتخصم منك، ومطلوب تسعد الجماهير ومطلوب مني كل السبل فلوسك ومكافأت هتغلط هعاقبك بالفلوس مفيش لاعب يتوقف”.
واستأنف: “ومفيش جمهور يشتم لاعب في مدرج لا هنخصم منه، لإن لغة العصر الفلوس، وأوربا بيعملوا كده، ومسمعناش ان عبد الواحد راح اتفاوض مع الأهلي وهو كمان رئيس نادي أصلا زميل يعني”.
وزاد مرتضى:” محمد عبد المنصف مدرب حراس مرمى ومعه 2 واحد قلب أسد والثاني دبلوماسي، مدحت عبد الهادي، واحمد مجدي اللي معاه رخصه ومثقف وكنت أتمنى إستمرار أيمن طاهر وحسين ياسر، لكن اللجنة اختارت الاسماء دي”.
وأختتم: “هنعمل شركه كره، أمير مرتضى أصبح رئيس قطاعات الكرة بالنادي، لإكتشاف المواهب، ويكون حلقة وصل بين فرق القطاعات والفريق الأول ومجلس الإدارة، انا كان يهمني الجهاز المصري الاول، وبشكر اللجنه لإنها من 10 ايام شاغلين وواجهتم صعوبات كبيره”.
