“في إفتراء وظلم”.. رضا عبد العال يطلق قذائفه ضد الجميع في الزمالك بعد الخسارة من الإسماعيلي!! -فيديو

تحدث رضا عبد العال لاعب الأهلي السابق، عن خسارة الزمالك من الإسماعيلي، وأطلق قذائفه ضد الجميع في الفارس الأبيض بسبب مايحدث من إنهيار.

وقال رضا عبد العال في تصريحات تليفزيونيه ببرنامج “البريمو” عبر قناة “Ten”:” منهم لله اللي إتسببوا في ضياع الزمالك اللي أخد دوري موسمين متتالين، وشهر يناير كنت أول الدوري، وحصل إفتراء وظلم وجابوا لعيبه مش قماشة الزمالك ومدرب عقيم خلص على النادي”.

وأضاف: “بيطلعوا تصريح ان فيريرا قال انا مش خايف على نفسي لكن خايف على مستقبل الزمالك، مأنت دمرت الزمالك ومستقبله، وكأنه كان سايب الدنيا وردي ولا خسرهم كأس لوسيل وخرجهم من إفريقيا وضيع الدوري، واللي ساعد المشرف اللي جاب الصفقات وكنا بنقول الرجل وكله كذب لكن دي إختيارات أمير مرتضى والله اعلم حصل إتفاقات ايه علشان يوافق على اللعيبه دي”.

وشدد عبد العال:” دي صفقات متلعبش بمركز شباب، المدير الفني لازم يمشي ده عمل تأليفه، بيلعب بدون باك رايت وحسام عبد المجيد اللي خربها في الدفاع بتلعبه ديفيندر، إيه العبقريه دي متلعبش بباك رايت ومعاك سيد نيمار دي حاجات تجنن، مدرب زي مغني اغنية بابا فين بابا هنا هو شبهه بالظبط”.

وأردف: “وطلع قالك المدرب إختيار المشرف العام ولغى اللجنه الفنيه بكل من فيها من لعيبه كبار، كل دول بيصبوا في مصلحة اللي ملعبش كرة، انا مش بهاجم ميدو، لكن بهاجم انك تاريخ ولعبت بره امسك انت اللجنه وجيب المدير الفني، ده يرضي ربنا؟”.

وواصل عبد العال:” الله يكون في عون جماهير الزمالك، كده كده ايدك والأرض من اللعيبه حتى زيزو بيشحت كره، والمدرب في التوهان وفالح بيأكل لبان وقاعد على الدكه، هم راميين الفوطة، ولازم المدرب يمشي”.