“فين المبادئ !!”.. إبراهيم حسن يحرج إدارة الأهلي بسبب صفقة فتوح .. ورسالة خاصة لـ جماهير الزمالك – فيديو

أكد إبراهيم حسن نجم الكرة المصرية السابق أن أحمد فتوح ظهير أيسر الفريق الأول لكرة القدم في نادي الزمالك يسير في الطريق الخاطئ خلال الفترة الماضية، مشيرًا إلي أن مجلس إدارة القلعة البيضاء اتخذ القرار السليم بشأن مصير اللاعب.

وكان مجلس إدارة نادي الزمالك قرر في وقت سابق إيقاف فتوح لمدة شهر مع خصم 25 % من قيمة عقده مع النادي مع استمرار قرار عرضه للبيع بسبب أزمة معسكر مواجهة زد في الدوري.

وقال “إبراهيم” :” فتوح بيدمر نفسه، ودماغة رايحة في حتة تانية، ومعندوش ثقافة إحترافية وهو مقتنع إنه أعلى من أي حد سواء الزمالك أو غيرة”.

وأشار :” مينفعش لاعب يخرج من معسكر مباراة وبقوله أنت بتتعالى على ايه، انت مخدتش 70 بطولة علشان تعمل كده، ولو عايز تسهر وتعمل حاجات تانية يبقى خلاص سيب الكرة بقى”.

وأضاف “إبراهيم” في تصريحات لبرنامج “اللعيب” على قناة “إم بي سي مصر” :” قرار نادي الزمالك صح والزمالك في الوقت الحالي يسير بشكل جيد وحاليا مفيش “عضلات” في فريق الكرة”.

وتابع :” جمهور الزمالك ميزعلش على فتوح لو راح الأهلي، لأنه مش ملتزم ونفس السلوكيات اللى كان بيعملها في الزمالك هيعملها هناك”.

وواصل “إبراهيم”: ” لو الأهلي تعاقد معاه يبقى فين مبادئ الأهلي اللى معروف بيها، ياخد لاعب سلوكياته مش مظبوطة، ودي جينات موجودة في شخصية اللاعب وصعب يكون ملتزم بعد كده”.

وأختتم :”وبعدين فتوح عمل كام كرة عرضية لغاية دلوقتي من بداية الموسم، ده عبدالشافي لازم يتعمله تمثال في الزمالك”.

شاهد: