تعليق صاعق من عمرو أديب على تولي حسام حسن تدريب منتخب مصر.. ويكشف صاحب قرار تعيينه!! – فيديو

علق الإعلامي عمرو أديب، على قرار إختيار حسام حسن وإبراهيم حسن لقيادة منتخب مصر، بعد رحيل روي فيتوريا.

وقال عمرو اديب في تصريحات تليفزيونية ببرنامج الحكاية عبر قناة “mbc مصر”:” احنا معانا مدرب ما خدش بطولة، انما الناس كلها كل ما يحصل حاجة يقولك نجيب حسام حسن فارجوا ان انا افكر حضراتكوا ان حسام حسن هو اختيار الجماهير المصرية”.

وتابع:” محدش يجي يقول بعد كده مين اللي جاب حسام وإبراهيم زي ما قالوا على اللي قبله مين اللي جابه، فاللي جابه زن المصريين، هاتولنا حسام حسن، ده هو اللي يعرف يربيهم هو اللي يعرف يضبطهم، هو اللي عنده الروح، فانا بس بذكركم من البداية ان حسام حسن وابراهيم حسن هو اختيار المصريين المفضل ”

وأردف أديب: “”معرفش ان المدرب روح حكاية انه روح دي والحماس واصله عارفهم ولما يزعقلهم وهيخافوا منهم اصله حسام ما بيرحمش هو احنا جايبين مدرب ولا جايبين مدير مدرسة احنا جايبين حد عنده خطط حد عنده اساليب تدريب حد عنده مدربين احمال ”

واضاف: “الرجل ده جاي يلعب 4 ماتشات، وان انت تتاهل لكأس العالم مالوش علاقة لا بالروح ولا بالحماس ولا انك مصري ولا ان ابويا مصري ولا اي حاجة”.

وشدد اديب:” “انا بالنسبة لي حسام وابراهيم حسن نتايج، ايه النتيجة جبت نتائج كويسة انا مبسوط ما جبتش نتايج كويسة متشكرين قوي وانت ما قدامكش مشوار صعب يعني مش حاجة مشكلة”.

وأشار: “يقولك شوفت الروح شوفت الغيرة على مصر، طب هو المدربين الاجانب اللي كانوا بيلعبوا مع كل الفرق التانية مكنش عندهم غيرة على الفرق، يا جماعة الكرة مش كده، الكرة خطط الكرة ودراسة ورخصة دولية ودورات خدتها في التدريب الكرة بطولات عملتها”.

وأكمل أديب:” حسام اعظم لاعب في تاريخ مصر ومن اعظم اللعيبة ارقام واحصائيات وكل حاجة، بس كمان في حاجة مهمة اسمها ايه الصفات الثابتة في الظروف المتغيرة، يعني انت شايفه كده في المؤتمر الصحفي هادي ونادي وجميل حطه تحت ضغط بقى”.

وأستطرد: “مرة حد يقول الحقيقة ويتكلم مشكلة حسام ايه وإبراهيم ان تحت الضغط يظهر أسوأ ما فيهم، هم لا يستطيعوا العمل تحت ضغط ولذلك يجب ان هم يتصرفوا بطريقة وبأخرى ان يعرفوا يعيشوا تحت الضغط، وعندما تكون مدربا لمنتخب مصر وداخل تصفيات كأس العالم، ويجب ان تتحمل كل انواع الضغوط هي دي مشكلة حسام وابراهيم اللي محدش عايز يقولها”.

وأستأنف: “كل واحد يقولك ايه ، اللي حصل حصل بقى، لا ما خلاص الرجل ده بقى مدربنا، يجب ان احنا نحسن له النصيحة يا عمي انت يجب ان تعرف كيف تتعامل تحت الضغط، مش فجاة في ماتش جيت تلعبه حصل مشكلة هتروح لافف وواخد طوبة ورامي الناس بالطوب”.

واتم:” انا بتكلم بصراحة رغم طبعا الناس بتزعل من الكلام، انما الصفات الثابتة في الظروف المتغيرة انت مشكلتك جواك مش براك، التحدي عندك قدامك فمدرب منتخب مصر غير مدرب المصري او او الزمالك او الاسماعيلي ده حاجة وده حاجة تانية، انت في مكانة تانية خالص وبتتعامل مع لعيبة تانية خالص”.