دافع الإعلامي أحمد سالم، عن حازم إمام عضو مجلس إدارة اتحاد الكرة المصري لكرة القدم، بعد الهجوم الضاري الذي يتعرض له بسبب روي فيتوريا المدير الفني لمنتخب مصر السابق.
وقال أحمد سالم، في تصريحات تليفزيونية عبر قناة “الشمس”:” لماذا الهجوم على حازم امام، انتم بتكرهوا اي حد يعمل حاجه، حازم امام برنس في نفسه لا محتاج فلوس ولا ناقصه شهره، وبيستفزني يقولك بيستغل منصبه في اتحاد الكره، لا ده وَاجه شيك جدا جدا، والقنوات العربيه بتتهافت عليه وبارقام تغنيه عن وجع الدماغ في اتحاد الكره”.
وتابع: “متكرهوش الناس في البلد، حازم امام نفسه ينجح، يقولك فيتوريا مدربش منتخبات، طيب كيروش درب منتخبات عمل ايه؟”.
واضاف سالم:” بقول لحازم ريح دماغك، الوضع وصل للبجاحه ان صحفي يقول هل حازم امام يتحمل الشرط الجزائي لفيتوريا، ياسلام!!، هو المدرب اتمسك بمخدرات وحازم كان شريكه “.
واشار:” هو حازم رئيس الاتحاد ومسمعتش حد اتكلم على جمال علام ولا بركات ولا الدرندلي، اشمعنى حازم واقف في الزور؟، هو جاب مدرب كبير في اوروبا ولم يوفق”.
وواصل سالم: “عمل ايه حازم وغلط وزعلك في إيه؟، علشان الهجوم المبالغ فيه، هو حازم اللي وضع جدول الدوري اللي على المزاج؟، هو نزل الانديه الجماهيريه درجه تانيه وطلع انديه الشركات؟، وعمل اختبارات الناشئين وعلشان ابنك يلعب يدفع فلوس”.
واكمل:” حازم امام هو الي قال للعيبه متحترفوش واي لاعب يحترف بنجري نجيبه، ولا هو مسئول عن التحكيم، كل شويه نهبش في حد وكأنه البعبع هو كان نفسه ينجح ومحققش النجاح الكافي”.
وأختتم: “نتمنى التوفيق لكابتن حسام حسن اللي لما هيخسر ماتشين الناس هتهاجمه والاسطوانات جاهزه، هو كان اخد بطوله علشان يدرب المنتخب، حسام نجم كبير وعنده النزعه الوطنيه واللاعب المصري بيحب الشحن الاوفر والحماس”.
