علق شريف إكرامي حارس مرمى نادي بيراميدز على إمكانية عودة رمضان صبحي للأهلي مرة أخرى، مشيرًا إلى أن كل الآراء التي قيلت في هذا القضية لم تكن مقنعة بالنسبة له.
وأثيرت حالة من الجدل خلال الفترة الماضية عن إمكانية عودة رمضان صبحي مرة أخرى إلى صفوف النادي الأهلي.
وقال “شريف” :” كل الآراء التي سمعتها في قصة رمضان مفهاش إقناع بالنسبة لي.. مثلا الناس اللى اتكلمت على إمكانية عودة رمضان قالت إنه يقدم اعتذار ويرجع”.
وأشار :”طب رمضان يعتذر على ايه .. اية الحق اللى رمضان صبحي غلط فيه واية معنى أو تفسير حق النادي ده .. هل رمضان أخل ببنود أو قصر في عقد أو دخل في خصام مع حد من المسؤولين في الأهلي لما كان موجود”.
وأضاف “إكرامي” خلال استضافته في برنامج ” الهدف” على قناة ” أون تايم سبورتس 2 ” :” هل اختلاف رغبتي مع رغبة المسؤول ده يعتبر غلط في حق النادي ؟.. إذن رمضان صبحي لم يخطئ في حق الأهلي”.
وتابع :” الناحية التانية الناس اللى رافضة عودة رمضان صبحي.. قالت علشان مبادئ النادي .. إيه اللغط اللى عمله رمضان صبحي في حق مبادئ النادي الأهلي”.
وأكد “شريف” :” رمضان ملوش فيديوهات بيسب رموز النادي أو يغلط فيها وبسؤاله .. وبسؤاله هل قصدك إمام عاشور ؟.. رد “شريف” لا بتكلم بشكل عام”.
وواصل :” رمضان مغلطتش فى أي طرف في الأهلي .. لكن قولى إن رمضان مينفعش يرجع علشان الجمهور زعلان منه علشان اختياره اتفهم ده”.
أكمل :” قولى رمضان مش هينفع يرجع الأهلي عشان المسؤولين الحاليين في الأهلي معندهمش الجرأة انهم يفتحوا باب المفاوضات معاه لأنه اختار نادي بيراميدز في وقت سابق .. لكن تقولى إنه مينفعش يرجع علشان مبادئ وقيم الأهلي أقولك انت بتناقض نفسك”.
وشدد “شريف” :” مينفعش لما الأمور تكون في صالحي يبقى الأمر إحتراف فقط، وأقول قيم ومبادئ لما يكون الموضوع عكس رغبتي لكن الجمهور من حقة يزعل من رمضان لأنه مختارش النادي الأهلي”.
وأختتم ” شريف” :” بقول للجماهير من حقك ترفض عودة أي لاعب للأهلي علشان اختار نادي تاني حقك، لكن تقولى أنا رافض علشان المبادئ علشان تدي كلامك أهمية ده خلط للأمور ولا اسمه تشجيع أو وجهات نظر، والكلام ده يمشى على رمضان صبحي أو قصة إمام عاشور “
