حذر الإعلامي خالد الغندور ، نادي الزمالك من فخ نهضة بركان في نهائي الكونفدرالية الأفريقية ، مؤكداً أن حالة الطمأنينة من الممكن أن تهدر اللقب.
وقال خالد الغندور في تصريحات عبر فيديو نشره على موقع التواصل الإجتماعي فيسبوك : دخل على موقع تذكرتي اكتر من ٤ مليون مشجع عاوزين يحجزوا ، وانا معرفتش اجيب تذاكر، الأهم أن اللى يروح يعرف أن عنده مهمة صعبة زي ما اللعيبة عندها مهمة صعبة جوا الملعب فالجمهور له دور مهم جداً جداً، منستعجلش اللعيبة ونعمل ضغط عليهم .
وواصل : دور مجلس الإدارة تحفيز اللاعبين مالياً ، لكن مش عاجبني حاجه ، أن البعض حاطط في بطنه بطيخه صيفي وبيقول خلاص الزمالك بطل كأس الكونفدرالية الأفريقية.
وشدد : يا جماعة الكلام دا غلط فريق نهضة بركان مش سهل زي ما الناس بتقول ، فريق قوي مخسرش ولا ماتش في الكونفدرالية ، مش معنا انك جبت جول هناك يبقي خلاص.
واستطرد : نهضة بركان ممكن يتحول لفريق قوي في أي وقت ، هما عندهم دوافع كبيرة زيك علشان يحققوا بطولة الكونفدرالية ، لأنهم خسروا الدوري هناك وكأس العرش ، فبطولة الكونفدرالية اهم هدف ليهم الموسم دا.
واضاف : انت هنا في مصر مقدرتش تكسب دريمز الغاني رغم أنك كسبته على ارضه تلاته ، وكذلك ارتا سولار حطك في ورطة هنا وجاب فيك جول في الشوط الأول.
وأتم : لازم الجمهور يدعم اللاعبين بشكل قوي وميستعجلش على المكسب وفي نفس الوقت ميهيصش مجرد ما نجيب جول أو اتنين ويفكر الماتش خلص ، بركان ممكن يجيب جول في الدقيقة ٩٠ ، فلازم تشجع لحد أخر دقيقة.
ويلتقى فريق الزمالك في الثامنة مساء الاحد المقبل، مع نظيره نهضة بركان المغربى على استاد القاهرة الدولي في إياب نهائي بطولة الكونفدرالية الافريقية.
وتلقى الزمالك خسارة، في إطار ذهاب نهائي كأس الكونفدرالية الأفريقية 2-1، التي لعبت في المغرب.
شاهد الفيديو
