خالد الغندور ينتقد احتجاج الزمالك على حكم نهائي الكونفدرالية لهذا السبب !! – فيديو

انتقد الإعلامي خالد الغندور ، بيان احتجاج مجلس إدارة نادي الزمالك  علي الحكم التونسي هيثم قيراط ، بسبب تواجد التونسي معين الشعباني على رأس القيادة الفنية لنهضة بركان.

وقال الغندور في تصريحات لبرنامج البريمو عبر شاشة قناة TEN الفضائية تقديم الإعلامي اسلام صادق : انا ضد بيان اعتراض مجلس الزمالك علي حكم الفار في مباراة نهضة بركان ، أنا دايما بشوف حكام شمال افريقيا اكتر قدرة علي تحقيق العدالة .

وأكد : لو بتقول معين الشعباني تونسي والحكم تونسي ، طب ما سيف الجزيري وحمزة المثلوثي توانسه ، مع كل الاحترام و التقدير لمجلس الزمالك ، البيان مش منطقي.

وواصل : من حق مجلس الزمالك يصدر أي بيان لكن لو الموضوع مرتبط بمعين الشعباني فأنا ضد ده.

واضاف : مجلس الزمالك متخوف من فوزي لقجع اللي كان رئيس نهضة بركان سابقآ، وفي ٢٠١٩ ضرب حكم مباراة النهائي مع الزمالك ، والناس بتقول أنه قوي قي الكاف ، ولكن بنفس المنطق فرئيس صن داونز السابق هو رئيس الاتحاد الأفريقي حالياً ، وفيه فار ، ولو فيه حكم بيجامل فالفار موجود وكل حاجه على عينك يا تاجر.

واستطرد : انا قناعاتي أن الفار طالما حسب يبقي الفار صح.

وشدد : انا ضد جمهور الأهلي لما يقول إن هدف امام عاشور في السوبر صح ويقولك عبدالله السعيد اللي مغطي ، ولما محمود عاشور يلغي هدف بيرسي تاو ، تلاقيهم يقولك راسم خطوط غلط ويقولك خلي محمود عاشور يعتزل.

وتطرق : مجلس الزمالك كان طلب في مرة تأجيل ماتش في الدوري ، طلع مجلس الأهلي اللي هو موجود حالياً وقالك بنرفض تأجيل مباراة الزمالك لأن دا بيخل بمبدأ تكافؤ الفرص ، النهارده واحنا بنتكلم علي الدوري الأهلي لعب 14 ماتش والزمالك لعب 15 ماتش ، يعني لسه مخلصش الدور الأول ، الماتشات اللي لعبهم مش كلهم دور أول دا فيهم دور تاني كمان ، ولحد دلوقتي الأهلي ملاعبش بيراميدز ولا مرة ، ولعب مع فرق تانيه رايح جاي ، هل دا منطقي

واضاف : ويقولك ممثلي مصر في القارة الأفريقية حسب ترتيب الدور الأول ، ايه الضحك ده ؟؟

وزاد : انت بتختار الأندية بناءً علي ايه ؟ دا المفروض أصلا أن بطل كأس مصر يشارك في الكونفدرالية ، انت لغيت القصة دي.

و استرسل: ايه ياجماعة ده ، السنه الجاية الأهلي عنده كأس العالم للأندية في شهر يونيو ، دا معناه الأهلي ممكن يقعد هناك شهر وكل الدوريات بتكون خلصت .

وأتم: الدوري بدأ في أخر سبتمبر ، يعني بقاله 8 شهور ، الزمالك والأهلي لعبوا 14 و15 ماتش فقط في المدة دي ، طب هتخلص الباقي أمتي ؟ دا معناه بقي اضغط ماتشات وزود إصابات ورباط صليبي.

شاهد الفيديو