إبراهيم عبد الجواد يوجه رسالة قاسية لـ بيراميدز: عايزين تخشوا في خناقة مع الزمالك والأهلي؟ ده الوداد والترجي ميقدروش يعملوها!

ألقى الإعلامي إبراهيم عبد الجواد اللوم على الإدارة الفوضوية لبيراميدز في فشله المتكرر، مُشيرًا إلى أنّ “سعيهم لمنافسة القطبين خلق حالة من عدم الاستقرار خارج الملعب، ممّا انعكس سلبًا على أداء اللاعبين”.

ويُضيف أنّ “التصرفات غير المنضبطة للإدارة، مثل الدخول في صراعات مع أندية أخرى وخسارة مباريات حاسمة، أدّت إلى فقدان الفريق لتركيزه وانهيار آماله في تحقيق البطولة”.

وقال إبراهيم عبد الجواد في تصريحات إذاعية: “بيراميدز منذ أن تم إنشائه بمسماه الجديد، صرف مصاريف مهولة، وضم لاعبين ملئ السمع والأبصار، وقدر يوصل لحافة منصات التتويج أكثر من مرة، ودائمًا يفشل في تحقيق بطولة”.

وتابع: “لازم هنا نضع الأمور في نصابها، هل بيراميدز لا يمتلك اللاعبين الأكفاء؟ يمتلك، ويمتلك الاستقرار المادي، لا يمتلك جمهور، هل يمتلك ممارسات إدارية واعية؟ في السابق كان لا يمتلك، هذا الموسم كان ماشي زي الفل حتى أخر 100 متر”.

وأضاف: “السنوات الماضية كان بيراميدز بيحط نفسه في نقار مع الزمالك والأهلي، والأهلي تحديدًا، ودي حاجة الداخل فيها مفقود، ده الترجي والوداد إللي في ضهرهم جمهور كبير معرفوش يخشوا الخناقة دي لأن الزمالك والأهلي حاجة تانية، هتقولي على راسهم ريشة هقولك أه، لأن عندهم تاريخ وجماهيرية في الوطن العربي كله”.

وواصل: “دي جماهيرية وحب وعشق على مدار أجيال وتاريخ مش بفلوس، حاجة محدش يعرف يكتسبها غير الزمالك والأهلي، فإنك تخش في نقار معاهم عشان تبقى راس براس مينفعش”.

وأردف: “أنا مش بتكلم على فكرة تطبيق اللوائح، لأن ده الكل فيه سواسية، المفروض يكون عندنا لوائح وضوابط وتمشي على الكبير قبل الصغير، لكن أنا بتكلم إن مينفعش نادي صاعد حديثًا مينفعش أكون عايز أخد نفس الاهتمام والتقدير، مفيش أصلًا أندية في إفريقيا كلها بتاخد الاهتمام ده”.

وأشار: “بيراميدز كان دايمًا عايز يخش يناطح القطبين، ده كان بيخليه يفشل في البقاء في المنافسة، لأن ده كان بيعمل عدم استقرار خارج الملعب، وده انعكس على اللاعبين، السنة دي فت شكل متغير، إدارة بيراميدز محدش بيسمعلها صوت ومش بتخش في مشاكل مع حد، وحتى الآفة الفنية إنه كان بيكسب المباريات الكبيرة ويخسر المباريات الصغيرة، اختلفت وأصبح يسير بشكل جيد جدًا، وقناعتي إن ده كان سببه انهم هاديين خارج الملعب، لكن جم في الآخر كل اللي هما بنوه طول الموسم هدوه”.

واستمر: “الأهلي في ضهره جمهور، فأنت لما تخش في عداء مع النادي هتخش في عداء ضد الجمهور، وده مش من مصلحتك، انت خد حقك في الملعب، لكن نتيجة الممارسات الإدارية غير المنضبطة، كلفتك خسارة بطولة كنت قريب منها جدًا، والفريق كله فك امبارح أمام الأهلي، تحس إن اللاعيبة كانت تحت ضغوط غير طبيعية ولما خسروا الدنيا فكت ومبقاش في ضوابط حاكمة لأي حد”.

واختتم: “كل هذا كان نتيجة ممارسات إدارية غير منضبطة، وهي السبب في عدم تحقيق بيراميدز لأي بطولة، على الرغم من أن هذه السنة كانت أفضل سنة إدارية لبيراميدز ما عدا الأمتار الأخيرة”.