المخرج محمد نصر يطالب الجمهور بدعم هؤلاء لتفادى تكرار سيناريو احمد رفعت !! – صورة

وجه المخرج محمد نصر طلب لجمهور الكرة المصرية بضرورة دعم عدد من اللاعبين من أجل تفادي تكرار سيناريو احمد رفعت.

وكتب محمد نصر عبر حسابه الشخصي على موقع التواصل الاجتماعي فيسبوك : حبايبى جمهور النادى الاهلى ممكن تدخلوا على صفحة محمود علاء او على صفاحتكم دعموه ارفعوا روحه المعنوية اتعاملوا معاه انسانيا محمود لعيب راجل قوى وبرة الملعب انسان جميل ومثقف ومتعلم اتدمر نفسيا من القاضية والاسيست رجاء ناخد من وفاة رفعت درس ..

وواصل : وبعد محمود دعموا رمضان صبحى مش مهم هو عمل ايه خلصت الحكاية دى وهو دلوقتى فى محنة وممكن تدمره نفسيا اكتر انا يارمضان نقدتك جامد بس من حبى فيك وانا بقولك عيش حياتك فى النادى الى تحبه بس خد بالك من نفسك وبيتك واولادك ومحنة وهتعدى وتطلع منها اقوى من الاول ..

وشدد : جمهور الاهلى العظيم كفاية تنمر واذية لشيكابالا هو فى الاخر انسان وبيغلط بس من الضغط النفسي احنا بنحول اللعيبة لمرضى نفسيين من كتر الشتيمة فيهم بيتحولوا فى السلوك بشكل عنيف جمهور الاهلى

وأضاف : سامح وخد من درس رفعت وكفاية تنمر على عبد الله السعيد هو مهموم بس بيحاول يبان قوى يالا نلحق اللاعب قبل مايشيل اكتر ونفسيته تتدهور وهو عامل قوى قوى وواقف لكن فى الحقيقة هو مخزن جواه الم فظيع..

وأكد : جمهور الزمالك الكريم تعاملوا مع امام عاشور وكهربا انسانيا وانسوا الى فات واتكلموا عنهم كويس وارفعوا روحهم كهربا حاصل عنده كهربا زيادة منً الضغط النفسي وامام ماسك نفسه شوية بس شوفوا فرحته فى الملعب ده مش فرحة بقدر ماهية شيل من الضغط النفسي الى واقع عليه بس بيحاول يكون طبيعى ..

وزاد : جمهور الاتحاد الحبيب خدوا بالكم من خالد الغندور وهشام صلاح ارجوكم نفسيتهم زفت.. جمهور الاسماعيلى الغالى خدوا بالكم من بهاء مجدى هو عامل قوى بس بيتقطع من جواه ارجوكم..

وأتم : السادة المحللين الفضائيين من اللعيبة السابقين كفاية لعب على مشاعر الجماهير بالضرب فى اللعيبة النجوم كفاية ارجوكم نطلع مرة بدرس نستوعبه كلنا مش عايزين نعمل ٥٠ رفعت احنا قربنا نفقد ادميتنا .. الله يرحمك يارفعت ويصبر قلب اهلك.