رسالة نارية من صالح جمعة لـ مسؤولي الزمالك بشأن رحيل شقيقه ويؤكد :”أحمد سليمان ضحك عليه” – فيديو

تحدث صالح جمعة نجم منتخب مصر السابق أن شقيقة عبدالله جمعة تعرض للظلم في طريقة رحيله عن الزمالك بعد قرار رفع اسمه من قائمة الفريق قبل 24 ساعة من غلق باب القيد.

وقال ” صالح” :” في يناير إللي فات والميركاتو إللي عمله الزمالك أنا مكنتش مقتنع بيه خالص، ومكنتش مقتنع باستبعاد عبد الله، وكنت شايف إن استبعاد عبد الله فيه خيانة ليه، الناس مكنتش أمينة”.

وأشار :” أنا كلمت أحمد سليمان وعبد الواحد السيد، الناس دي مكنتش أمينة مع واحد من كباتن الفريق إللي فضل فيه 7 سنين وجاب 12 بطولة للنادي، محدش في مصر يقدر ينكر إن عبد الله جمعة كان راجل بيلعب بقلبه، كان بيموت نفسه وبيعشق الزمالك”.

وأضاف ” صالح” في بودكاست من الجول للجول مع الإعلامية دينا الإدريسي :” أنا رحت واتكلمت مع الكابتن أحمد سليمان، وقال لي عبد الله موجود معانا، والناس دي شالت عبد الله من القائمة قبل يوم واحد من غلق القيد، ده مكنش بيعمله الأهلي”.

وتابع :” عبد الله أخر 3 شهور كان عنده مزق ولعب مع الأهلي مباراة مهمة، وكانوا بيرجعوه بالحقن، كنت بقوله إنت لسه صغير على الحقن دي، كان يقولي عشان مفيش حد، أنا مش مقتنع إنك تمشي لاعب صغير عنده 27 سنة وتقعد لاعب عنده 40 سنة”.

وواصل :” طالما هسيب عبد الله جمعة يكون عشان خاطر لاعب هيديني سنة واتنين وتلاتة و10، أنا من أكتر اللاعيبة إللي اتفرجت عليها ولعبت معاها محمد عبد الشافي، لاعب كبير جدًا ومن أحسن الأظهرة إللي شفتهم في حياتي وفي التاريخ، بس أنا كنادي الزمالك استفدت من عبد الشافي في إيه السنة دي؟ طيب فتوح لما بيغيب من بيلعب؟ عمر جابر، طب ليه مشيت عبد الله جمعة ليه”.

وبسؤاله إنت قصدك إن الكابتن أحمد سليمان ضحك عليه؟، رد “ًصالح”:” أه أنا قلتها أكتر من مرة وأقولها 100 مرة في وشه، احنا ناس عرب من سيناء ونفهم في الأصول وعندنا كلمة، وطالما أخدت منك كلمة يبقى الموضوع انتهى، أو كنت قولي حبًا في اللاعب إللي قضى 7 سنين في النادي وكان مُخلص”.

وأكمل :” إنت دفعت بيه ومزقته وأخد حقن ولعب، النادي الأهلي بقى فيه ميزة مُخلص مع اللاعيبة، يفضل مع اللاعب المصاب لحد ما يبقى كويس، وزي ما كلموني وقالولي إن ناصر ماهر عائد من الإعارة واحنا عايزين نساعدك، وكان وقتها الأهلي عامل توأمة مع نادي في التشيك”.

شاهد: