مسؤول الوحده الاماراتي يكذب دعبس ويكشف مفاجآت بشأن احمد دياب في أزمة أحمد رفعت ! – فيديو

كشف خالد الهنائي العضو المنتدب السابق بنادي الوحدة الإماراتي عن تفاصيل مفاوضاته مع احمد دياب رئيس النادي السابق ورئيس رابطة الأندية حول التعاقد مع اللاعب احمد رفعت .

وقال خالد الهنائي في تصريحات لبرنامج البريمو عبر شاشة قناة TEN الفضائية تقديم الإعلامي محمد فاروق : قبل ما اجي مصر علشان نتفاوض مع فيوتشر قلت لاحمد دياب حسب معلوماتي ان اللاعب احمد رفعت عنده مشكلة مع التجنيد.

وأشار : قالي لا الأمور تمام انت بس تعالي واحنا ملزمين ان اللاعب يطلع معاكم بشكل رسمي قلتله خلاص هاخده معايا وأنا راجع لأني عندي مباراة بعد كام يوم قالي لا مش هينفع لان لازم أخلص تصريح السفر الأول له، قالي 48 ساعة واخلص ، الموضوع خد 5 أيام مش 48 ساعة زي ما قال .

واستمر : كلمته قلتله احمد دياب اللاعب لازم يجي علشان فترة الانتقالات هتقفل ، قالي لا اديني كام يوم ، بعدها كلمني قالي اللاعب هيطلع على ليبريا ويجيلك من هناك ، قلتله هيروح ليبريا ليه ؟ قالي تصريحه طالع يروح ليبيريا ، قالي خليه يوصل غانا وهنخليه يرجع لكم من هناك .

و استكمل : اتفاجأت بعدها انه وصل غانا وبعدين ركب طيارة ليبريا ، كلمت احمد دياب قلتله إزاي يروح ليبيريا ودا مكانش اتفاقنا.

وكذب دعبس : دكتور وليد دعبس إمبارح قال انه راح بطيارة خاصة ودا مش صح، هو جه على طيران الإمارات.

وزاد : بعد كدا قلت لاحمد دياب إزاي يروح ليبيريا قالي هيجيلك من هناك ، قلتله لا لو راح ليبيريا الإنتقالات هتقفل ومش هبقي عاوزه.

وأكد : بعدها نزل اللاعب من طيارة ليبيريا اللي كانت طالعه من غانا قبل ما تتحرك بربع ساعة، اللاعب قعد في المطار اربع ساعات وجه الإمارات ، حتي مكانش معاه شنط، وكيل اعماله أخد شنطة من مصر وراح له الإمارات.

وقال : احمد دياب كلمني قالي متلعبش اللاعب ، قلتله ليه !؟ قالي لان الجماعة هنا ” معرفش مين الجماعة ” مدينا تصريح فخليني أخلص الموضوع وابقي لعبه.

وأتم : قلتله لا ياحبيبي انا دافع فلوس وهلعبه ، والسوفت بتاع التحويل وصلك ، اللاعب قانونيا بتاعي ، وشارك اللاعب ضد النصر وتألق ، البداية كانت قوية والناس كلها كانت بتهتف له في الإمارات.

شاهد الفيديو