فجر الإعلامي محمد المحمودي مفاجأة ، حول أزمة غضب الجمهور من قميص الفريق امام الشرطة الكيني، بعدما انتقد البعض ضعف تصميم القميص .
وقال المحمودي مقدم برنامج هاتريك عبر شاشة قناة اون تايم سبورتس 2 : قصة الملابس ، الموضوع مش زي ما الناس شايفاه خالص.
وأشار : أولا الزمالك ابرم أفضل عقد في تاريخه وتاريخ الأندية المصرية مع شركة ملابس.
وأكد : الزمالك استفاد بمبلغ مليون دولار ، بجانب توريد ملابس لكل فرق الزمالك في القطاعات المختلفة، ودا كان أزمة قبل كدا ، فيه لعيبة كانت بترفض تنضم لناشئين الزمالك لان مكانش فيه هدوم.
وتابع : الشركة تعاقدت مع الزمالك في وقت قريب ، فمكانش لسه تم الانتهاء من تصميم قميص الزمالك ، فالشركة اعتمدت على تصميم قميص المصري اللى كان متعاقد معاها ، وتم التعديل عليه ، ودا غلط طبعا ، كان لازم الشركة تكون مستعدة للتعاقد مع فريق كبير زي الزمالك.
وشدد : لكن هيكون فيه تصميم جديد للزمالك في ماتش السوبر الأفريقي قدام الأهلي ، وهيكون فيه تصميم تاني لقميص الفريق مع عودة الدوري.
