منسي علم على قفاك !! المخرج محمد نصر يفتح النار على لاعبي الأهلي عقب خسارة السوبر الأفريقي امام الزمالك – صورة
شن المخرج الأهلاوي محمد نصر ، هجوما عنيفا ضد لاعبي الفريق الأحمر ، عقب خسارة السوبر الأفريقي امام الزمالك .
وكتب محمد نصر عبر حسابه الشخصي على موقع التواصل الاجتماعي فيسبوك : هى لعيبة المغرب دماغهم واحدة يعنى عطية الله بيعمل نفس كعب الشيبى من نفس المكان والكعبين جه منهم جونين.
وواصل : خد عندك ٤ من الاهلى نازلين الماتش بيفكروا فى حاجة واحدة يعملوا ايه فى الماتش يخليهم ترند وتفاعل على السوشيال ميديا ومين هيتريق فى احتفاله على لعيبة الزمالك اذا احرز احدهم هدف.
واستمر : اما اللعيبة الى بتقولوا عليهم عواجيز شيكابالا من برة الملعب والسعيد من جوة الملعب اشعلوا حماس اللعيبة طول الماتش و لعيبة الزمالك كلها نزلت فايقة فى دماغها حاجة واحدة يكسبوا الماتش بعد استفزازهم قبل المباراة والتيفو الى عمله جمهور الزمالك قبل الماتش خلى لعيبة الزمالك تبكى وزاد اللعيبة قتال وروح وشراسة للفوز واسعاد جماهيرهم.
وأكد : اما حضرتك بتنام عايز الريتش يعلى وانت فى اول ضربة جزاء اعمل ده لما تكسب اهو منسى المنسى علم على قفاك ..السيد كولر انت ولعيبتك اتغلبتم من جوميز فى الدورى ولولا انسحابه كان ممكن يكسبك تانى ويضيع الدورى.
وتابع : ومع ذلك من امتى الاهلى لما يتقدم على الزمالك يعمل اتوبيس وميكروباص وحنطور اكتر من ٧٠ دقيقة ومش عارف تبنى هجمة واحدة دى فضيحة كروية ولعيبة الاهلى مش عارفة تطلع بالكورة من نص ملعبهم ومقضيها كور عالية من شنو لمدافعين الزمالك الى كان بيبنى الهجمات بروقان ومحدش بيضغط عليهم وجوميز نازل بتشكيل هجومى مش خايف وسيطر على نص الملعب بمعلمة من السعيد والناصر الماهر ولعيبة الاهلى عارضى الازياء فى معرض اسلام بدلة فى وسط الملعب بيتعمل عليهم حاورينى ياكيكا والسمك فى البحر ودوخينى يالمونة ..
واستطرد : الاخ احمد بلال هو انت قولت لمين ماتسافرش السعودية احسن لك الاهلى ولا الزمالك لان الزمالك هو الى سافر وكسب وخلاك عبرة..وبنتايك الظهير الايسر الى بيقولوا جوميز مش عايزه كان نجم المباراة الاول لعيب عالى قوى ومرمط الجبهة اليمنى للاهلى وكل عيش عليهم كلهم .
وأتم : انا مايهمنيش الزيطة الى حاصلة لانه حقهم لان الزمالك كدة زعيم افريقيا الاول لانه كسب بطل دورى الابطال..انت سلمت جمهورك لجمهور الزمالك يطلعه مسرح على السوشيال ميديا استحمل بقى جمهورك ياخد حقه منكم..
