كشف الحكم عاطف حسين ، الحكم الرابع بمباراة الزمالك والمصري البورسعيدي الموسم الماضي ، حقيقة إيقافه ، بسبب حديثه إعلاميا عن أزمته مع جوميز مدرب الأبيض .
وقال عاطف حسين الحكم الرابع في ماتش الزمالك والمصري في تصريحات لبرنامج ملعب اون تايم المذاع عبر شاشة قناة اون تايم سبورتس الفضائية : انا معرفش حاجه عن موضوع ايقافي ، الكلام في المواقع لكن مفيش حاجه رسمي ، مطلعش اي قرار.
وأكد : طلعت بدون إذن ؟ أنا عارف اللى ليا واللى عليا ، ومش هعمل حاجه تعملي مشكلة مع اللجنة.
وتابع : انا كان عندي مشكلة في موضوع معين وتم الإساءة ليا ، كان طبيعي أطلع اقول عملت دوري ، هل دا يزعل الناس ؟
وشدد : مكانش فيه قرار يمنع الظهور ، زمايلي كلهم طلعوا ، وأنا طلعت زيهم.
واستمر : متواصلتش مع حد من اللجنة ، ولو فيه قرار هيعرفوني وعلاقتي كويسه بكل أعضاء اللجنة.
وقال : كابتن محمد فاروق حد محترم ، ولو صدر قرار منه ، انا تحت أمره.
وزاد : انا كتبت تقريري عن واقعة جوميز في ماتش المصري عكس اللى اتقال.
واستمر : مش دوري بقي أتابع التقرير وصل فين ، أنا زعلت من الهجوم اللى حصل عليا مش بتاعتي يطلع قرار ولا لا.
واستطرد : دوري انتهي مع تسليم التقرير.
وأتم : المشكلة إن كابتن محمد فاروق وقت الواقعة كان في السعودية ، فلما جه قال مكانش فيه تقرير ، والناس هاجمتني علشان كدا رديت ، ورجع بعدها قال فيه تقرير.
