رد مثير من أحمد سالم على شوبير حول أزمة عقد الهارب كهربا مع الزمالك ..” محدش جبره” – فيديو
رد الإعلامي أحمد سالم المتحدث باسم مجلس إدارة نادي الزمالك على تصريحات أحمد شوبير حول صحة توقيع عقد الهارب محمود عبد المنعم كهربا لاعب النادي الأهلي مع نادي الزمالك.
وكان “شوبير” قد تحدث خلال برنامجه الجديد على قناة الأهلي على عقد كهربا مع نادي الزمالك وادعى تعرض اللاعب للظلم في تلك الواقعة من قبل بعض الأشخاص في اتحاد الكرة لصالح نادي الزمالك.
وقال ” سالم” :” كابتن أحمد شوبير صديق عزيز وبينا كل احترام، وبقول أنه من المؤسسين للإعلام الرياضي، وأكيد كل واحد يغلبه انتمائه فبالتالي مينفعش اقوله خليك في حيادي في حديثك عن الزمالك والأهلي”.
أشار :” كابتن شوبير راح قناة الأهلي وسمعته هو بيتكلم عن موضوع غرامة كهربا لصالح نادي الزمالك ومش عارف هنفضل امتي لغاية امتى نتكلم في قصة إن كهربا اتظلم من نادي الزمالك وإنه حصل تلاعب في العقد مش عارف هنسفيد ايه من كده”.
وأضاف ” سالم” خلال تقديمه برنامج ” تحت الشمس” على قناة ” الشمس” : ” الكابتن احمد مجاهد ومجدي عبد الغني وكل شهود الملف ناص يحلفوا بالطلاق إن تعاقد الزمالك مع كهربا إزاي معرفش .. طب الاتحاد الدولي والمحكمة الرياضية اضحك عليهم إزاي معرفش”.
وتابع :” تقابلت مع كهربا في إحدى المرات وقالي انتوا خدتوا مني “فلوس حرام” قولته مش انت مضيت على عقد للزمالك قالي اه بس تم توثيقة بعدين فهل من المبادئ والمثل العليا التمسك بفكرة توقيت توثيق العقد في فكرة بطلان العقد نفسه”.
وتساءل ” سالم” :” هل من المعقول أن الناس بتتكلم عن مظلومية غرامه كهربا اللي وقع بنفسه بحجة موعد توثيق العقد بدل ما يتقال للاعب أنه يلتزم بفعله ده راجل موقع نفسه ده اللي ببمضي على نفسه إيصال وضاع مثلاً يطلع يقول أنا معليش فلوس لحد لان الايصال ضاع.. ده مفروض لو مدي كلمه من غير امضاء يتلزم بيها وده اللي يتقال للاعب مش العكس”.
أكمل :” كابتن شوبير خرج برضوا يتكلم على لجنة الانضباط في قصه أزمة كهربا ومروان حمدي واحنا ملناش علاقه بمروان أنا بتكلم على كهربا هو حضرتك يا كابتن مشوفتش الفيديوهات وهتافاته والإيحاءات اللي عملها .. بدل ما تطلع تقول مكنش يصح يعمل كده طالع تقول إنه معملش حاجه وكان بيغني عادي”.
وواصل ” سالم” : ” طيب اخبار واقعة حسين الشحات والشيبي ايه يا كابتن شوبير ليه محكتهاش زي الحكاوي اللي حكيتها وغلطت فيها لجنة الانضباط اهو لو كانت وقعت عقوبة عليه مكنتش هتوصل لمرحله المحاكم والقواضي كده”.
وشدد ” سالم” :” أنا أتمنى بس لما يجي يحصل طرح مش هقولك حيادي خلينا حقانين وفيه عدالة وشفافية في كلامنا اللي غلط نقول عليه غلط مش نبررله”.
وأختتم ” سالم” : ” اخيرا بقى مش احنا اللي بنعمل أو بندعي المظلومية كزمالك .. لما تيجي تتكلم عن واقعه بقالها خمس سنين واتقفلت تدعي المظلومية في ملف كهربا مش عارف هتوصل لايه؟”.
شاهد:
