حسام حسن ينفجر: مقارنة منتخب مصر بأي فريق في إفريقيا مش في صالحنا.. أنا مش بتاع تريند وعاملوني زي الأجنبي!!
أكد حسام حسن، المدير الفني لمنتخب مصر، على أن مجموعة الفراعنة في تصفيات أمم إفريقيا هي الأصعب، موجهًا هجومًا حادًا للمنتقدين.
وقال حسام حسن في تصريحات خلال المؤتمر الصحفي: “سنواجه منتخب قوي، من الناحية البدنية والفنية، موريتانيا وكاب فيردي من أفضل الفرق الإفريقية في الفترات الأخيرة”.
وتابع: “مجموعتنا هي أقوى مجموعة في تصفيات كأس أمم إفريقيا، وأرجو من البرامج الرياضية إنها تاخد بالها من أحاديثها، بيقولوا إحنا مش بنلاعب حد، وإننا هنوصل كأس الأمم وكأس العالم لإننا بنلاعب منتخبات ضعيفة”.
وأضاف: “الكلام ده بيأثر نفسيًا ومعنويًا على اللاعبين، عايزين نتعامل مع المنتخب المصري باحترافية زي ما بنتعامل مع الأندية، بلاقي ناس بتقول هنلاعب جورماهيا والشرطة وبلاقي الناس تقول دي مواجهات متزنة أو مجموعات متزنة”.
وأضاف: “تعالوا نقارن بين المحترفين اللي عندنا والمحترفين اللي في المنتخبات التانية، مش هتكون المقارنة في صالحنا، إحنا عندنا بس تقريبا ٣ لاعيبه محترفين في أوروبا، على عكس منافسات الأندية في أفريقيا، الأندية المصرية بتلعب بعناصر كلها دوليين”.
واستكمل: “حد هيجي يقولي انت اختارت مين على حساب مين؟ عاملوني كإني مدرب أجنبي، المدرب الأجنبي ماحدش بيسأله الأسئلة دي، أنا بختار عناصر من وجهة نظري الفنية، عايز مثلا مدافع قوي وبيلتحم بقوة وهكذا”.
وأردف: “أنا مش بتاع تريند، ولا فيه حاجة ممكن تضيف لأسم حسام وإبراهيم، أنا جاي بتكليف من الشعب وأصحاب القرار، إحنا بنشتغل عشان مصر، احنا عندنا احتلال أجنبي للمدربين في مصر”.
