الغندور يستشهد بواقعة من الدوري الفرنسي للرد على الجدل المثار حول ركلة جزاء الزمالك أمام البنك الأهلي- فيديو
أستشهد الإعلامي خالد الغندور، بحالة مماثلة لركلة جزاء الزمالك أمام البنك الأهلي، وقعت في الدوري الفرنسي واحتسبها الحكم لمسة يد، وذلك للرد على إثارة الجدل بشأن ضربة جزاء ناصر منسي.
وقال الغندور، خلال تصريحات تليفزيونية ببرنامج “ستاد المحور “:” الحكم محمد عادل النهارده كان في جلسه استماع في اتحاد الكرة، ونفى كل التسريبات اللي طلعت على لسانه بأنه قال للحكم محمد سلامه يخربيتك يا ميدو دي خبطه في الأرض وبعدين جت في أيده”
وتابع:” محمد عادل قال في جلسه الاستماع أنه عارف مين اللي مطلع الكلام ده على لسانه، وقال لو في تسجيل زي ده ياريت يذيعوه وانا هروح بيه النيابه نشوف صوتي ولا لأ .. الكلام ده محصلشي”.
وأضاف الغندور:” محمد عادل قال أنا حسبت ضربه جزاء لنادي الزمالك على لمسة الايد الاولى مش الثانيه قبل ما توصل للأرض وشايفها صحيحة”.
وأشار: “سبحان الله نفس كرة ركلة جزاء نادي الزمالك بالظبط قدام البنك الأهلي بتاعه ناصر منسي اللي في حكام وقنوات كتيره قالوا إنها مينفعشي تتحسب خطأ، اتكررت امبارح في الدوري الفرنسي اللي هو من افضل خمس دوريات على مستوى العالم في مباراة محترفنا المصري مصطفى محمد”.
وشدد الغندور:” ونفس الكره بالظبط اللاعب نط والثاني جت في أيده والحكم حسبها خطأ علشان لمسة اليد، لكن هنا في ناس بتقول لقطة ناصر منسي مش خطأ رغم لمسه يد نيمار”.
وواصل:” الغريب أن في ناس كتيره ماسكه في الحكم محمد عادل وفي واقعه تسريب محادثه صوتيه ليه بانه ارتكب خطأ قانوني يستوجب إيقافه في حاجه محدش سمعها اصلا ولا اتذاعت للناس “.
وأكمل الغندور:” لكن يوم واقعه الحكم امين عمر اللي كلامه كان مذاع للناس كلها على الهواء، وهو بيرفض يحسب ركلة جزاء لنادي الزمالك في خطأ قانوني، لما قال أصل الكوره ٣/٤ برا وربعها جوا ونسي أن القانون بيقول لازم تتخطى بكامل محيطها “.
وأختتم:” الغريب أن وقتها محدش هاجم الحكم بالشكل ده ولا طلب إيقافه رغم أن ده متذاع ليه صوت وصوره من قلب الملعب وقت المباراة وواقعه محمد عادل كلام منقول محدش سمعه”.
شاهد:
