رسالة عاصفة وتحذير شديد اللهجة من أحمد سالم لإمام عاشور وإعلام الأهلي بسبب الزمالك – فيديو
وجه الإعلامي أحمد سالم، رسالة عاصفة لإمام عاشور لاعب الأهلي والإعلام الأهلاوي بسبب تجاوزهم ضد الزمالك بعد أزمة اللاعب في النادي الأحمر.
وقال سالم،خلال تصريحات تليفزيونية عبر قناة “الشمس”:” من وقت ما راح إمام عاشور نادي الأهلي وطلع مبررات كتيره منها حديث المهندس عدلي القيعي واللي بالمناسبة كانت مبررات ساذجة جدا واللي ناس كتيره خدتها مادة للسخرية.. لكن في الآخر قولنا احنا مش طرف كنادي الزمالك بالقصة”.
وتابع:” لكن المشكلة أن كل ما بتحصل حاجه تخص إمام عاشور أو حتى كهربا بتلاقي تلقيح على نادي الزمالك، وبشكل في منتهى الرخص واحنا مش طرف في اي حاجه”.
وشدد سالم:” من كام يوم إمام عاشور عمل مشكلة كبيرة واتغرم مليون جنيه، والدنيا انقلبت والقنوات حاولت تلطف الدنيا ويجيبوا 2 ليمون واللي كلم حماه واللي كلم نسايبه، حاولوا يلموا الموضوع إعلاميا “.
وواصل:” اللاعب اعتذر والزمالك ملوش علاقه بالقصة، ولقينا تلقيح كالعاده على الحته التانيه، أنت عايز ايه يا إمام عاشور من الزمالك؟، أنت اسمك اتعمل في الزمالك وروحت المنتخب واحترفت بسبب الزمالك، وانت اللي مستحملتش ورجعت، وطلعت قولت في قناه الأهلي انك كان نفسك ترجع الزمالك ولما ملقتش عرض روحت الأهلي، يبقى الزمالك وحش في ايه؟”.
واشار سالم:” وبعدين انتوا صدقتوا نفسكم في قصه هنربيه عندنا وعندكم دي؟، ما تربوه براحتكم إحنا مالنا وتحطوه في حضانه مبتسرين، ما تعملوا كده من غير تلقيح على الزمالك”.
واردف:” كهربا وإمام عاشور مشاكلهم عندكم أكبر بكتير لما كانوا في الزمالك، إمام عاشور قعد سنه احتياطي وبيلعب في كل المراكز ولا بيفتح بوقه ولما غلط مره اتوقف، لكن لا عمره عمل مشاكل ولا راح اقسام ومحاكم ولما مرة صبغ شعره معتبشي القائمة وكان موضوع تافه وكان ماشي على العجين ميلخبطوش”.
وزاد سالم:” كابتن اسامه حسني سايب كل المصايب اللي عنده ويقولك هتعملوا ايه مع مصطفى شلبي اللي طلع زعلان من التغيير.. وانت مالك يا اخي ما تخليك في حالك وفي فريقك هو حد كلمك أنت مالك أنا أعمل ايه”.
واستأنف:” محدش يحمل جمهور الزمالك أخطاء حد، محدش قال للاعب يروح يضرب واحد في مول علشان هو مضغوط من الجماهير ولا قال لكهربا يغلط في حد ويتغرم علشان مضغوط “.
وأختتم:”حاسبوا لعيبتكم براحتكم وغرموهم مليون جنيه، محدش يدخلنا في القصه مش بتاعتنا دي، ولو مش عارفين تبرروا مشكلتكم في التعاقد مع امام عاشور دي مشكلتكم انتم مش احنا، بلاش شغل بتاع الحته التانيه والاسطوانه المشروخه دي، غير مسموح بالإساءة لنادي الزمالك ومش هنسكت على الكلام ده”.
شاهد:
