ميدو يشعل مواقع التواصل الاجتماعي من جديد بشأن موقفه من عدم تشجيع الأهلي والهجوم ضده!! صورة
أثار نجم الزمالك السابق أحمد حسام ميدو، جدلاً واسعاً بتصريحاته الأخيرة حول عدم تشجيعه لفريق الأهلي في بطولة كأس العالم للأندية.
وقد دافع ميدو عن موقفه هذا عبر حسابه الرسمي، موضحاً أسباب تصريحه والهجوم الذي تعرض له.
وأكد ميدو في تصريحاته على حبه الشديد لنادي الزمالك وانتمائه له منذ الصغر، مشيراً إلى أنه بدأ مشواره الكروي في نادي الزمالك وهو في التاسعة من عمره. وأوضح أن تربى على حب الزمالك واحترام المنافسين في نفس الوقت.
وكتب ميدو عبر حسابه الرسمي بموقع التواصل الاجتماعي “فيس بوك”: “انا ابن الزمالك وأكبر فخر ليا في حياتي اني ابن المدرج ابن الثالثه يمين بلعب في الزمالك من وانا عندي ٩ سنين وانا عيل صغير كنت بروح ب فانلة الزمالك في المواصلات علشان الناس كلها تعرف اني ناشئ في الزمالك”.
وتابع: “بطاقتي وانا عيل صغير هي كارنيه اتحاد الكورة اللي مكتوب عليه اسم الزمالك.. تتلمذت على ايد مدربين عظماء علموني اني انتمي لفريقي بس وما أشجعش اي نادي ثاني في مصر بالذات إلا نادي الزمالك اي كان بيلاعب مين ولكن في نفس الوقت اتربيت اني احترم كل المنافسين واهنيهم لو كسبوا واباركلهم واقولهم هارد لك لو خسروا”.
وأضاف: “هو ده معنى الروح الرياضية بالنسبة لي!! لما اتسألت في الاستوديو هتشجع الاهلي في كاس العالم للاندية رديت بطبيعتي دون اي نفاق او كذب لان بكل بساطه مفيش حاجه في الدنيا تستاهل انك تكون كذاب ومنافق! اتفق معاكم ان التوقيت ما كانش مناسب وبعتذر لأي حد زعل اني قلت الكلام ده في حدث مهم يخص النادي الأهلي وانا شايف الناس اللي زعلت بخصوص ان الوقت مش مناسب عندهم كل الحق”.
وأردف: “اما لو اتسألت مليون مرة هتشجع اي نادي تاني في مصر غير الزمالك إجابتي هتكون هي هي عمرها ما هتتغير لغاية لما اموت..اما بخصوص الهجوم اللي بتعرضله فأنا عاذر الناس لانهم ممكن يكونوا اتعودوا على اجابات مختلفه في السنوات الاخيرة من ناس تصدروا المشهد في الاعلام وهما اكتر ناس بيأذوا المنافس في الخفاء واكتر ناس بتتمنى من قلبها خسارة المنافس من جواهم”.
واختتم: “مش هرد على اي حد هاجمني لان بكل بساطه أنا في مرحلة في حياتي شايف ان مفيش حاجه في الكورة تستاهل الخصومة والخناق بالعكس الكورة اتعملت علشان نتسلى بيها ونستمتع بيها ونناكف بعض شوية بس بالنسبه لي ماتتعداش اكتر من كده!! مره ثانيه بعتذر اني كنت سبب في جدال قائم الايام اللي فاتت للاسف مش ذنبي ولكن بسبب مدمنين الترند والدخلاء على كرة القدم اللي لا يمكن يفهموا أبدا عقلية مشجع الكورة!!”.
