تعليق قوي من أحمد سالم بشأن مباراة الزمالك وغزل المحلة وطلب عاجل لهاني أبوريدة – فيديو
أعرب الإعلامي أحمد سالم، عن استيائه من تهميش الأندية الجماهيرية في الدوري المصري، وذلك بعد إقامة مباراة الزمالك وغزل المحله، على ستاد المحله ووجود عدد كبير من جماهير الناديين.
وقال سالم، خلال تصريحات تليفريونية عبر قناة “الشمس”:” شاهدنا مباراة الزمالك مع غزل المحله اللي بالمناسبه هو اه كان انديه شركات لكن تحول لنادي جماهيري، لما شوفت المباراة حسيت قد ايه عندنا قوة ناعمه وحاجه ممكن تبسط الناس وتسعدهم، وبنهملها وهي اداء المباريات مع انديه جماهيريه”. .
وتابع: “فكرة وصول الزمالك قبلها بيوم واحتشاد الجماهير لاستقباله، ومحاصرتهم للفندق والهتاف للاعبين وصولا للاستاد، وجمهور المحله مستني الماتش ده اللي بيحصل مرة في السنه كأنه عيد، اكتشفت قد ايه اننا حارمين نفسنا من المتعه والجماهير”.
وشدد سالم:” لحد امتي هتضيع قيمه تسويقيه من ايدينا بوجود الانديه الجماهيريه تخيل القيمه التسويقيه لو في انديه جماهيريه كثيره فين المنصورة، وليه الشرقية وكفر الشيخ واسيوط مفيش عندهم فرق وفين اسوان ومنتخب السويس”.
وأضاف: “لامتى انديه شركات تبقى موجوده على حساب الاندية الجماهيريه قمة الاستفزاز ان انديه شركات بيصرفوا ملايين، وتلاقي رئيس نادي و قاعد وجانبه رئيس النادي التاني وغالبيتهم لهم انتماء سواء للزمالك أولا الاهلي، ومفيش جماهير”.
وواصل سالم:” ليه اضيع الفرق الشعبيه مقابل فرق شركات عامله زي الخضار المسلوق وبتنفق انفاق لانعرف مصدره وبيصرفوا ملايين هل ده استثمار، عندنا انديه بتضخ مليارات ومبتكسبش جنيه”.
واردف: “اتمنى من هاني ابوريده رئيس اتحاد الكرة الجديد نظره للانديه الشعبيه والدوري، لازم نرجع الانديه الجماهيريه وانديه الشركات اعمل لهم دوري لوحدهم او لو عاوزين اعلانات او ياخدوا الانديه الشعبيه ويبقى مثلا الاسماعيلي بتروجيت”.
وأختتم:” بنشوف الدوري السعودي ونتحسر علي وجود الجماهير، وبقينا زي الدوري القطري من غير حمهور حتى الاهلي مبيروحش بورسعيد والاسماعيليه بعد ماكان الناس بتستنى ماتشات الاهلي والاسماعيلي هناك لغايه امتى هنفضل مستسلمين للفكره دي”.
شاهد:
