تحدث الإعلامي إبراهيم عبدالجواد، مقدم برنامج “ملعب أون تايم” المذاع عبر قناة أون تايم سبورتس، عن تفاصيل جديدة حول مفاوضات نادي الزمالك مع نجمه أحمد مصطفى “زيزو” لتجديد عقده، مؤكداً أن بعض الروايات المنتشرة مؤخراً لا تعكس الحقيقة.
وقال عبدالجواد: “الكلام عن استبدال مستحقات زيزو بفيلا مش صحيح. اللي حصل إن فيه حد من محبي النادي عرض فيلا بشكل إضافي كمبادرة لتسهيل الأمور وحل الأزمة المالية في ظل الأرقام الكبيرة المطروحة أثناء المفاوضات”.
وأضاف: “زيزو نفسه عنده رغبة في الاستمرار مع الزمالك، لكنه وضع شروطه الخاصة للتجديد. هو عاوز عقد يبقي قريب من المبالغ اللي عُرضت عليه من أندية الخليج. زيزو عارف إن الحب والجماهيرية اللي بيعيشها في الزمالك مش هيلاقاها في أي مكان تاني، لكنه كمان عارف إن خروجه مخاطرة كبيرة”.
وتابع: “زيزو بيطلب راتب قريب من العروض الخليجية علشان يضمن مستقبله، وده حقه كلاعب كبير. في الوقت نفسه، والده ووكيله بالفعل بدأوا يناقشوا عروض خارجية. لكن بالنسبة للأهلي، لازم أوضح إن الأهلي برا القصة حالياً. اسم الأهلي بيتقال كنوع من الضغط، لكن مفيش أي مفاوضات حالية بين الأهلي وزيزو. الأهلي كان في الصورة في وقت سابق، لكن دلوقتي الموضوع انتهى”.
وأضاف عبدالجواد تصريحاته بأن الوضع الحالي يؤكد أن القرار النهائي بشأن مستقبل زيزو لم يُحسم بعد، وأن المفاوضات ما زالت مستمرة بين الطرفين، وسط محاولات جادة من إدارة الزمالك للإبقاء على نجم الفريق.
واستمر : إدارة الزمالك عاوزه تدي لزيزو فلوس كتير جداً، لكن المشكلة في رغبة زيزو إنه يحصل على مبالغ تقارب اللي كان هيخدها لو رحل لأحد أندية الخليج. هو مش عاوز مجرد عقد كبير، لكن عاوز تأمين مادي يتناسب مع قيمة العروض اللي وصلته من بره”.
وأضاف: “الإدارة شايفة إن أهم حاجة دلوقتي هي تجديد عقد زيزو بأي شكل، وبعد كده يفكروا في أي خيارات مستقبلية، سواء كانت إعارة أو بيع في الصيف. الأولوية عندهم حالياً هي الحفاظ على استقرار الفريق وتجديد عقد اللاعب، اللي هو واحد من أهم العناصر في الزمالك”.
وتابع: “الزمالك بيحاول يوازن بين قدراته المالية ومتطلبات زيزو، لكن اللاعب كمان عاوز يتأكد إنه هيحصل على عقد يضمن مستقبله ويكون قريب من العروض اللي كانت هتيجي له لو قرر الرحيل”.
واختتم عبدالجواد حديثه قائلاً: “الكرة الآن في ملعب زيزو ووكيله، لكن إدارة الزمالك عندها نية واضحة إنها تعمل كل اللي تقدر عليه علشان تحافظ عليه في الفريق، حتى لو الموضوع هيحتاج لتضحيات مالية كبيرة”.
