كشف محمد الدماطي، عضو مجلس إدارة النادي الأهلي، عن تأثره الشديد بالضغوطات والانتقادات التي يتعرض لها، مؤكدًا في الوقت ذاته على ثقته الكاملة في قدرة النادي على تجاوز أي صعوبات.
وكتب محمد الدماطي، عضو مجلس إدارة الأهلي، عبر صفحته الشخصية بموقع “فيس بوك”: “الحمد لله أنا عندي من الشجاعة والثقة إللي يخليني اقول كل اللي جوايا من غير كسوف بعيد عن اي حاجة”.
وتابع: “وبعترف بوضوح اني كبني آدم طبيعي أهلاوي متعصب وفي موقع مسئولية، بتأثر بشكل سلبي جدا من كمية النقد والضغط المتواصل، يمكن لمرحلة محدش يتخيلها عكس ما الناس بتبقي فاهمة”.
وأضاف: “والأحساس دة بيزيد لأن حقيقي شايف الصعوبات والتحديات وفي نفس الوقت معنديش شك في أسلوب ادارة الكورة في النادي اللي مهما حصل بيقدر يجتاز اي صعوبات و يكمل”.
واستمر: “المهم ان كل الضغط النفسي دة اللي ببقي متخيل انه حيفضل سايب جوايا رواسب مهما حصل بينتهي بمجرد ما بشوف الجمهور فرحان، مجرد كلمة واحدة كويسة بتمسح أي حاجة قبلها، متفهم جدًا ان الاهلي هو جنة جمهورة، الجنة اللي مش متخيل انة يشوف فيها حاجة غلط و لو لفترة صغيرة ، متفهم جدا ان اي صعوبات في الدنيا الاهلي بيهونها و انة مش مجرد نادي دة دواء لحاجات كتير اوي لينا كلنا”.
