أمير عزمي مجاهد يرد على السؤال الأصعب .. مين سبب رحيل جروس عن الزمالك ويحكي موقف صادم !!

كشف أمير عزمي مجاهد عن اسباب رحيل المدير الفني السابق لنادي الزمالك السويسري جروس عن نادي الزمالك.

وقال أمير عبر برنامج الكورة مع فايق على قناة ام بي سي مصر 2 : ” مين كان مسؤول عن رحيل جروس؟ الله أعلم، هما عارفين، ناس بتقول إنه مشي لسبب فني، وناس بتقول إنه عشان علاقته بالنادي”.

وتابع : ” الكلام كان إن الزمالك بيفاوض ميكالي، ولم ينفي أحد من النادي، وأنا طلبت من الإدارة إنها تنفي وقلت للكابتن حسين لبيب قالي إنه هيقول بعد يوم 8″.

وشدد : ” جروس طلع في 13 مؤتمر صحفي، هل حد حس إنه بينسي؟ والكلام إللي اتقال إنه مشي عشان علاقته باللاعبين وإن اللاعبين تواصلوا مع الإدارة هذا الأمر يدين الإدارة، أقسم بالله لو أنا في الإدارة ولاعب قال كلام زي ده والله همشيه من النادي”.

وواصل : ” أنا من بلغت جروس برحيله، أنا جاءني اتصال صباح يوم القرار، وصعب عليا إنه كان بيفكر وبيحضر لمباراة بتروجيت، الراجل ده نضيف، أنا كلمته وقلت له الإدارة بلغتني إنك مشيت والمدرب الجديد سيصل غدًا، قال لي مفيش مشكلة أنا رايح الملعب، وقال للاعبين أنا عندي مباراة بتروجيت القادمة وعايزين نركز فيه وأنا مش مهتم بالكلام إللي بيتقال، لكن اللاعبين كانوا حاسين”.

وشدد : ” أنا متربي وبصون الإنسان المحترم، وأنا شايف إن غلطة جروس إنه بيتعامل باحترام زيادة عن اللزوم”.

وأتم : ” ما علمته إن جروس جلس مع المسؤولين لتسوية مستحقاته ولم يصلوا لاتفاق وسافر لبلده وبعد 3 أيام لو لم يصلوا لاتفاق سيصعد الأمر”.