بعد الهجوم على مجلس الإدارة.. نيرة الأحمر تعتذر لجمهور الزمالك وتوجه لهم رسالة هامة ومؤثرة
قدمت الإعلامية نيرة الاحمر، وعضو مجلس إدارة الزمالك، إعتذار لجماهير النادي، بسبب الإخفاقات الأخيرة للفريق، ووجهت لهم رسالة هامة.
وقالت الأحمر، في تصريحات تليفزيونية ببرنامج “ملوك الصالات”، عبر قناة “الزمالك”:” دي اول مره اطلع بعد مباراة بيراميدز، طبيعي الجمهور يزعل بسبب الخسارة من بيراميدز والمجلس يعمل في ظروف صعبه جدا، وزعلهم على دماغنا من فوق والفتره القادمة تكون افضل”.
وأضافت:” شوفت غضب يوم ماتش بيراميدز ، واللي زعلني مش الغضب والهجوم عليا، زعلانه على زعلهم، جمهور الزمالك عاوز الفريق احسن فريق، اكيد المسئول شايل المسئوليه وفي ظروف صعبه، لكن زعل الجمهور زعله وبيبذل اقصى جهد”.
وشددت الأحمر:” انا مش زعلانه من غضبهم تجاهي لكن زعلانه على زعلهم، والجماهير تروح زعلانه، وحد يقول وجعتوا قلوبنا الكلمة اثرت فيه جدا، وفريقي يخسر بخسارة ثقيله، ومقدره زعل الجمهور، الفتره القادمة نعمل اقصى ما يمكن من جهد وتفرح الجماهير الغضبانه لانها تستحق”.
وواصلت: “الجماهير ياما غيرت نتائج بطولات، وياما جابت بطولات وشوفته بنفسي، اهم مرتين في اخر فتره في الصالات، بطولتين جم بارض الاهلي، بطولة افريقيا لليد والطائرة سيدات دول الجمهور جابوهم من ارض المنافس ومن قلب الاهلي، الجمهور ده خلانا جبنا بطولتين في وقت الفريقين مكنوش احسن حاجه”.
وأشارت الأحمر:” من حق الجمهور يزعل ويغضب ويجب ان اتحملهم وقت الغضب، الموضوع كان صعب جدا وببقى فرحانه بوجودهم وقت البطولات ووقت زعلهم حباهم برده، ومش هبقى عاوزهم وهم بيجيبوا بطوله وازعل وقت الغضب لا”.
واردفت: “ان شاء الله القادم خيروسعاده وفرح للجماهير، مش هنسى واحد يوم ماتش بيراميدز وهوبيقول وجعتوا قلبنا تخيل انت تسبب في وجع قلب ناس، حتى لو المسئول في ظروف صعبه اكيد المسئول عنده خطأ ويتحمل المسئولية، ولما نخطئ لازم نتحمل غضب الجمهور ، انت جاي ف ظروف صعبه وضائقه ماليه هنحل ده في الغرف المغلقه”.
وتابعت الاحمر:” بشكر كل اللي بيساندوا والجماهير اللي بتكون موجوده في الكبوات قبل الفرح، ولازم نسعى لتحويل الغضب لفرحه، وان شاء الله يتحول، الناس دي بتحب بلا مقابل هم بيدفعوا من جيوبهم، هم مش بس بيحبوا بلا مقابل بل بيدفعوا، الزمالك ترمومتر حياتهم زي ماهو ترمومتر حياتنا”.
وأكملت: “الناس المسئوله بتسعى بكل ما اوتيت من قوه علشان الجمهور يفرح ومنظر يوم بيراميدز ميتكررش، متقبلين غضبهم لان ده حقهم علينا مين ينسى يوم الكونفدرالية والاستاد متقفل علينا غير فرق الصالات، مش هبقي عاوزه وجودهم وقت البطولات والدعم لا لازم نتحمل غضبهم”.
وأختتمت الأحمر:” مش هنسى كلمة المشجع وهو بيقول وجعتوا قلبنا وبتكرر في اذني، احنا في مرحله عصيبه لكن هندوس على نفسنا علشان الجمهور، وزعلكم على رأسنا من فوق وهنسعى لتحويل الغضب لفرح وانتصارات وجماهير الزمالك عظيمه وبنعتذر بجد والقادم افضل وكله فرح”.
