علق الإعلامي كريم رمزي، على تعاقد الزمالك مع البرتغالي جوزيه بيسيرو، لتولي القيادة الفنية للفريق الأول لكرة القدم بالفالس الأبيض.
- قرر مجلس الإدارة بعد ترشيح وتوصية لجنة التخطيط الرياضي لعدد من السير الذاتية للمدُربين، تعيين البرتغالي جوزيه بيسيرو مدرب بورتو وسبورتنج لشبونة الأسبق مديراً فنياً للزمالك لمدة موسم ونصف .
وكتب رمزي عبر حسابه الرسمي بموقع التواصل الإجتماعي “فيسبوك”: جوزيه بيسيرو اختيار غير مناسب للزمالك، بداية في مشكلة عندنا في الكرة في مصر عموما مش الزمالك بس، هي اننا دايما بنحاول نختار المدرب الأفضل مش الأنسب”.
وتابع:” وبيسيرو مدرب كبير وعنده CV محترم ودرب في المنطقة العربية والأفريقية وفي مصر كمان، بس هل بيسيرو الأنسب للزمالك؟”.
وشدد رمزي: “في رقم لازم تبقى عارفه ان بيسيرو من بعد تجربة الوحدة في ٢٠١٣ مقعدش في فرقة لمدة عام كامل واحد، ده بعيد عن المنتخبات”.
وأردف:” مدرب مش مستقر خالص ممكن يمشي بقراره علشان مش بيتحمل الضغوط، او يمشي من جانب ادارات الاندية علشان سوء النتائج، وده حصل مع الأهلي وبورتو وسبورتنج براجا والشارقة وفيتوريا جيماريش وسبورتنج لشبونة في الولاية الثانية”.
وأشار رمزي: “مدرب ميستحملش الأزمات المالية علشان كدة مشي من جيماريش، مدرب ممكن يستخدم الشرط الجزائي ويسيبك في اي وقت زي ما حصل مع الأهلي”.
وواصل:” او الكبيرة بقى مدرب مش هيقعد معاك ويمشي بالتراضي لو حبيت تمشيه من غير ما تدفع الشرط الجزائي او تقلله وده حصل مع نيجيريا وده كان كلام نسي إيسيان، عضو اللجنة التنفيذية للاتحاد النيجيري لكرة القدم لوكالة الانباء الفرنسية، إذا كان لدينا المال لدفع تعويضاته، فسنكون مستعدين لإقالته من منصبه، نحن لسنا سعداء”.
وأكمل رمزي: “وأشار إيسيان إلى أن النتائج المتواضعة للمنتخب تحت قيادة بيسيرو، والتي تضمنت التعادل في مباراتين أمام منتخبات أقل تصنيفًا، كانت سببًا رئيسيًا في التفكير في إقالته”.
وأستطرد:” بالمناسبة بيسيرو كمل ضد رغبة الاتحاد النيجيري اللي مقدرش يدفع الشرط الجزائي ويمشيه ورغم كدة قدر يوصل نهائي كأس الأمم”.
وأكد: “الخلاصة ان بيسيرو مدرب كبير بس اخر ١٢ سنة مع الفرق والمنتخبات باستثناء نيجيريا لم يقدم اي شيء، التعامل المالي معاه صعب بمعنى انه لو تعثر مع الزمالك مش هيمشي الا لما ياخد كل حقوقه، ولو نجح ممكن يستخدم هو الشرط الجزائي مع اول عرض افضل”.
وأختتم: يعني بيسيرو جيد ووارد طبعا ينجح بس الأصل انه مش مناسب للزمالك دلوقتي، اه تقولي يعني انت كنت شايف مين بعد جروس، كنت شايف مدرب شبه جوزيه جوميز.. عنده طموح ياخد بطولات لاول مرة، مدرب عايز يكبر اسمه.. مدرب يعرف يتعامل مع ظروف صعبة وضغوطات ونواقص، لكن بصراحة اختيار بيسيرو.. استسهال”.
