كشف جمال العدل، عضو لجنة الاستثمار وتنمية الموارد بالزمالك أن تسمية لجنة الإنقاذ أمر يزعجه ويصف حال الزمالك بأنه ينهار وهو أمر غير صحيح، وايضا صفقات الفريق الفترة المقبله وأمر التجديد لأحمد مصطفى زيزو.
وقال العدل في مداخلة هاتفية لبرنامج “زملكاوي”، على قناة” الزمالك”:” مد فترة القيد الأفريقي منح اللجنة فرصة أكبر لعمل صفقات أفضل وكان هناك صفقتين أجنبيتين تم الإنتهاء منهما، لكن تم الانتظار فمن الممكن أن تجد اللجنة صفقات أفضل في الأيام القليلة القادمة”.
واضاف: “بنحاول نتعاقد مع صفقات اجنبيه مصريه يعني مصريين ومجنسين، وميدو معه تيم كامل وشغالين وبحاول نجيب ناس احسن من اللي كنا هنجيبهم وهنجيب صفقتين تلاته”
وشدد العدل: “الناس متجيش خالص على زيزو هوضحى بـ4 مليون دولار علشان الزمالك، ولايصح الناس تزعل منه، هو احسن لاعب في افريقيا والطبيعي يحصل تفاوض بينا وبينه”.
وتابع:” زيزو عاوز النادي واحنا عاوزينه، والاجواء الرخيصه دي بلاش منها وهيجدد، والاندية التانية بتجيب صفقات بـ5 مليون دولار ولما نجي نجدد للاعب ضحى علشانا يتكلموا انتم مالكم”.
وأشار العدل:” الناس تهدى شوية، مش علشان خسرنا ماتش نهد الدنيا ما الانديه بتخسر وتتعادل زي بيراميدز والاهلي، ولسه هنخسر”.
وأكمل:” اتفقنا مع صفقتين 2 اجانب، والاكيد هنجيب صفقتين كبار يشيلوا الفريق”
واختتم: “عادي يعني لما الونش مكنش يومه، والماتش كبوه وعدت، الناس مفكره بنكلم من دماغنا لا احنا في لجنة الاستثمار من اول يوم وتحت قيادة حسين لبيب”.
