واصل عصام الحضري، نجم منتخب مصر السابق، هجومه على بعض الممارسات داخل النادي الأهلي، مشيرًا إلى أن الجماهير الحالية ليست بنفس الروح التي كانت تميز جمهور القلعة الحمراء في الماضي.
وخلال ظهوره في برنامج “العرافة” على قناة النهار، قال الحضري تعليقًا على صورة جماهير الأهلي: “مع احترامي، جمهور الأهلي اللي موجود حاليًا مش هو جمهور الكيان اللي كان زمان، جمهور الأهلي الحقيقي هو بتاع زمان، الله يرحم عم حسين وحربي وجزرة، دول اللي كانوا بيدعموا الفريق بكل إخلاص”.
وأضاف: “دلوقتي بقينا نسمع عن روابط ولجان رياضية، الجمهور اللي يُفترض يكون السند الحقيقي للفريق، بقى يتلقى تعليمات عن مين يشجع ومين لا، فين جمهور التالتة شمال اللي كان بيقف مع كل اللاعيبة؟”.
وتساءل الحضري مستنكرًا: “هل من المنطقي إن جمهور الأهلي في مباراة القمة يهتف لكل اللاعيبة ما عدا اتنين؟! هل الجمهور من حقه يشتم لاعب لمجرد إنه طالب بحقه؟ إحنا في عالم احتراف، ولو الأهلي قرر الاستغناء عن لاعب محدش هيقول (حق اللاعب)، لكن لو لاعب طلب الرحيل، يطلع الجمهور بناءً على مكالمات يهاجمه! ليه الكيل بمكيالين؟”.
وواصل الحضري انتقاداته: “التشجيع الحقيقي هو دعم كل اللاعبين اللي بيلعبوا في الفريق، هي دي القيم والمبادئ اللي المفروض تكون موجودة، مش تشجيع بالطلبات والتعليمات”.
واختتم قائلًا بسخرية: “هروح العباسية عشان بقول الحقيقة؟ طيب، الحقيقة بتوجع، لكن في النهاية الأهلي فوق الجميع.. هما دايمًا بيقولوا كده، مش كده؟”.
