الوضع كان سيختلف في وجودنا.. أحمد مرتضي منصور يعلق على أزمة ملف تجديد “زيزو” للزمالك-فيديو

أكد أحمد مرتضي منصور عضو مجلس إدارة نادي الزمالك السابق، أن أحمد سيد زيزو يمثل 40% من قوة الفريق الأبيض، مشيرا إلي إن رحيله المحتمل خاصة لصالح الغريم التقليدي الأهلي، سيكون بمثابة ضربة قوية للقلعة البيضاء.

وقال أحمد مرتضي منصور، خلال حواره في “جول بودكاست”، مع عبد الرحمن مجدي، إنه لو كان متواجدًا في نادي الزمالك لقام بالتجديد مع أحمد زيزو، لأنه من اللاعبين الملتزمين والمميزين داخل الفريق.

وتابع: كان من الممكن أن تقوم إدارة الزمالك بالتجديد لـ زيزو من خلال استخدام الرعاة، خاصة أن زيزو لاعب ملتزم ويستحق كل شئ.

و رد : رأيك في قصة زيزو؟ هما غلطتهم إنهم معملوش زي ما إحنا عملنا مع إمام عاشور، عاشور إحنا بعناه لأن كان يتبقى في عقده فترة قليلة، ومش هنستفيد منه لأن عنده رغبة في الرحيل، أنا أول واحد وافقت على بيعه، الإدارة قرار إما تأخذ قرار أو تكون مايع، لاعب جاءه عرض بـ 3 مليون دولار، وكنا اشتريناه بـ 8 مليون جنيه، كان لازم نبيعه، نبيعه ونجيب غيره، وأنا قلت لو عايز يروح للأهلي مباشرة عندي استعداد أبيعه بـ 3 مليون دولار، ده رقم كان كبير، والأمر الثاني إن كان عندنا أزمة، لأن ممدوح عباس كان يضغط على النادي، وعندك لاعيبة بتقولك عايزين ناكل ونشرب وكباتن الفريق الكبار الأحمر في اليد ورضا هيكل في الطايرة وشيكابالا في الكرة، بيقولوا لو سمحت بيعه وأعطينا أموال، إمام مكنش عايز يجدد وكان عايز يسافر، هل أقول لا! هيعمل زي زيزو دلوقتي هيضحك عليك ومش هيعبرك.

و أوضح : لو كنا موجودين كنا سنجدد لـ زيزو، المهم يكون عندنا الرغبة في التجديد، لأن في وقت البيع بيكون أفضل، زيزو وقت العرض الذي وصل له من سنة ونصف لو كنت موجود كنت هخيره لو عايز تتباع تتباع دلوقتي أو تجدد دلوقتي، مش أفضل أجل الموضوع عشان يكون اللاعب هو اللي سايق، أنا بالنسبة لي مفيش عاطفة، مفيش لاعب أهلاوي ولا لاعب زملكاوي، في لاعب جدع ولاعب نصف جدعنة ولاعب مش جدع، أنا مشفتش أي لاعب ضحى، هو واحد فقط محمد عبد الشافي وكنت مستغرب ليه، قلت له ووهو مسافر السعودية لما ترجع هزود ليك عقدك قال لي لا أنا الحمد لله مش عايز زيادة، الباقي كله مفيش.

و أردف : مفيش لاعبين في العصر ده رموز، كله بيدور على مصلحته، مشفتش تضحية من أي لاعب، كان في لاعبين والنادي مفهوش فلوس يقولوا مشينا من النادي، ولما تيجي فلوس يقولوا بنحب النادي، أنا لا أنسى كلمة عمر جابر لما قال لي إحنا بنلعب في الخليج، نادي الزمالك بقى اسمه نادي الخليج ده في وقتنا، ومرة كنت بجيب لاعب من الأهلي قال لي أنا عايز ألعب في الخليج بقى، قلتله يعني إيه قالي أصلهم مسميين الزمالك دلوقتي الخليج عشان معاه فلوس.

وعن الونش قال : من اللاعبين الجدعان الونش، كان عنده وكيلين سيد مرعي وميدو حزين، كان في وكيل عايز يجيبه النادي، وهو لم يوافق وكان عايز يأتي عن طريق وكلاءه، ودي جدعنة.

وأكمل: الزمالك سيخسر كثيرًا بعد رحيل زيزو من الجانب الفني للفريق الأول لكرة القدم.

وأختتم: لو أنا متواجدًا في مجلس الإدارة كنت هتصرف من أجل التجديد مع زيزو حتي لا يرحل عن الفريق نهائيًا، وكان من الممكن يخرج إعارة ويعود من جديد.