شوبير يوجه رسالة للزملكاوية: ”زي ما انتقال محمد شريف ليك عادي.. ليه زعلان من رحيل زيزو للأهلي؟” فيديو

واصل الإعلامي أحمد شوبير تعليقه على الجدل الدائر بشأن انتقالات اللاعبين بين الزمالك والأهلي، مشيرًا إلى أن الأمر لا يجب أن يُقابل بازدواجية في المعايير بين جماهير القطبين.

وقال شوبير، خلال تصريحاته عبر إذاعة “أون سبورت إف إم”: “بسأل سؤال بسيط.. ليه الأهلاوية زعلانين من احتمال انتقال محمد شريف للزمالك؟ وفي نفس الوقت، ليه الزملكاوية زعلانين من انتقال زيزو للأهلي؟ زيزو شايف إن مصلحته في الأهلي، شايف إنه حقق جماهيرية ونجومية كبيرة، وقادر يصنع نجاح جديد مع الأحمر”.

وأضاف: “جمهور الأهلي فرحان بانضمام زيزو، طيب لما انت مبسوط إن عقده خلص مع الزمالك وجاي للأهلي، ليه تزعل لما شريف، اللي عقده خلص مع الخليج، يفكر يروح الزمالك؟ الوضع مختلف كمان، شريف كان بره ورجع، فليه الكيل بمكيالين؟”.

واختتم شوبير تصريحاته قائلًا: “الوضع ده مش جديد.. لاعب من الإسماعيلي يروح الزمالك، تلاقي الجماهير فرحانة، ولو راح الأهلي، يطلع الكلام إن الأهلي بيفرّغ الدراويش! طيب ما اللاعبين دول عقودهم خلصت، والنادي اللي اشتراهم فاوضهم بشكل طبيعي. لازم نتعامل مع الأمور دي باحترافية.. الزمن اتغير”.