فتح هاني سعيد، المدير الرياضي لنادي بيراميدز، النار على رابطة الأندية خلال مداخلته في برنامج “الكورة مع فايق” على قناة MBC مصر 2، بسبب توقيت مباراة فريقه ضد سيراميكا، والمقرر إقامتها قبل 3 أيام فقط من ذهاب نهائي دوري أبطال أفريقيا أمام صن داونز.
هاني سعيد قال:”هل في فريق في أوروبا بيلعب مباراة في الدوري قبل نهائي دوري الأبطال بـ3 أيام؟ ده مبيحصلش خالص، مفيش مراعاة، اللي حط ماتش 28 مايو واضح إنه مكنش متوقع إن بيراميدز يوصل النهائي”.
وتابع:”أنا بقولك لو الأهلي أو الزمالك كانوا مكان بيراميدز، هل كانوا هيلعبوا بين ذهاب وإياب فاينل أفريقيا؟ أنا شايف لأ”.
ورد عليه الإعلامي إبراهيم فايق قائلاً:”فيه ناس بتستشهد إن الأهلي موسم 2022-2023 لعب ضد المقاولون وسافر بعدها وخسر من صن داونز 5-2، ومحدش أجّل”.
لكن هاني سعيد علّق بحسم:”أنا مش بتكلم على دور مجموعات.. أنا بتكلمك على فاينل أفريقيا، دي حاجة تانية خالص، وسؤالي واضح: هل الأهلي أو الزمالك لو مكانّا، كان اتلعب ماتش في الدوري قبلها بـ3 أيام؟ أنا شايف لأ”.
وفي النهاية قال فايق:”أنا مقدرش أحكم.. دي قرارات رابطة الأندية، ومش دوري أفتي فيها”.
